ԱԺ ոչ կոալիցիոն խմբակցություններն այսօր կեսօրին ավարտեցին արտահերթ նիստ հրավիրելու ստորագրահավաքը: Հիշեցնենք, որ նիստը հրավիրվում է Կենսաթոշակային բարեփոխումների օրենքից Պարտադիր կուտակային բաղադրիչի գործադրումը 2014թ. հունվարի 1-ից 2015թ. հունվարի 1-ը տեղափոխելու հարցը քննարկելու համար:
«Բարգավաճ Հայաստան», Դաշնակցություն, «Ժառանգություն» և ՀԱԿ խմբակցությունները միասին ապահովել են արտահերթ նիստը հրավիրելու համար պահանջվող նվազագույն 44 պատգամավորի ստորագրությունները: ՀՅԴ խմբակցության պատգամավոր Ա. Մինասյանը «Առաջին լրատվական»-ի հետ զրույցում ասաց, թե ստորագրահավաքին միացել են նաև անկախ պատգամավորներ Էդմոն Մարուքյանն ու Խաչատուր Քոքոբելյանը:
«Այդ ընթացքում պետք է իրականացնել մասնագիտական և հանրային լայն քննարկումներ, սահմանադրական բողոքարկումներ՝ վերացնելու կամ չեզոքացնելու կենսաթոշակային բարեփոխումների բոլոր հնարավոր բացասական հետևանքները»,- ասաց Ա. Մինասյանը:
Արդյոք հիմնական բացասական դրույթը կենսաթոշակային հիմնադրամին աշխատավարձերից համապատասխան հատկացումներ անելու պարտադիր լինե՞լն է՝ հարցին նա պատասխանեց. «Այո, նաև այդ պարտադիր պայմանն է: Ինչպես նաև եկամուտների նվազեցումն է, ֆինանսական և աշխատանքային շուկաներից բխող ռիսկերն են, ժողովրդավարական վատթարացող վիճակը, տնտեսության մենաշնորհային վիճակից բխող ռիսկերը և այլն»,- ավելացրեց պատգամավորը:
Անկախ պատգամավոր Էդմոն Մարուքյանի խոսքով՝ հունվարի 1-ից, երբ դեռևս չեն բարձրանա աշխատավարձերը, չի կարելի նվազեցնել մարդկանց ստացած եկամուտը 5 տոկոսով: Մարուքյանի խոսքով՝ այս համակարգի ներդրման հետաձգման արդյունքում կարող են քննարկվել համակարգի հետ կապված բազմաթիվ այլ հարցեր:
Մարուքյանից հետաքրքրվեցինք՝ շանսը որքանո՞վ է, որ արտահերթ նիստ հրավիրվելու դեպքում, այնուամենայնիվ, նախագիծը կհետաձգվի՝ հաշվի առնելով քվեարկության արդյունքները: «Դա, բնականաբար, կախված է քննարկումներից, այն բանից, թե ինչ փուլով կգնան քննարկումները: Քանի դեռ այդ մասով ոչինչ դեռ պատրաստ չէ, չեմ բացառում, որ ոչ դրական արդյունք լինի: Սակայն 4 խմբակցությունները պատրաստ են: Ինչ վերաբերում է կոալիցիային, չեմ կարող ասել, չգիտեմ նաև այս պահին կառավարության դիրքորոշումը»,- հավելեց Մարուքյանը:
Ամեն դեպքում ՀՀԿ խմբակցության ղեկավար Գալուստ Սահակյանը ԱԺ-ում լրագրողների հետ հանդիպմանը հայտարարել է, որ ՀՀԿ խմբակցությունը չի տապալի մյուս 4 խմբակցությունների նախաձեռնությունը, քննարկմանը կմասնակցի, որպեսզի քվորում ապահովվի: «Իրենք իրար հետ բոլորը միասին 53 հոգի են, կարող են 44 ստորագրություն հավաքել նիստի համար: Իրենք մտածում էին, որ քննարկմանը մենք չենք մասնակցի, քվորում չի ապահովվի, բայց, իհարկե, մենք կմասնակցենք: Մարդիկ ուզում են քննարկել՝ թող քննարկեն, ի՞նչ է պատահել»,- ասել է Գալուստ Սահակյանը:
Արտահերթ նիստը նախատեսվում է անցկացնել այս ուրբաթ օրը՝ նոյեմբերի 15-ին, ժամը 12-ին: Այսօր կեսօրին արդեն Ա. Մինասյանն այդ ստորագրահավաքը փոխանցել է ԱԺ քարտուղարություն: