Ռուսաստանի նախագահ Վլադիմիր Պուտինին շնորհվել է կորեական ավանդական թեքվանդո մարտարվեստի 9-րդ պատվավոր դանի գոտի և դիպլոմ: Ինչպես հաղորդում է RIA Novosti-ն, դիպլոմը և գոտին նախագահին անձամբ հանձնել է Թեքվանդոյի համաշխարհային ֆեդերացիայի նախագահ Չու Չհոն Վոնը:
«Չեմ կարծում, որ արժանի եմ նման բարձր դանի: Կհամարեմ, որ սա մեր ընդհանուր միջոցառումն է՝ կապված այս հիանալի մարտարվեստը հանրաճանաչ դարձնելու հետ»,- ասել է Պուտինը:
Ֆեդերացիայի նախագահի խոսքով՝ աշխարհում մի քանի մարդ կա, որոնք պարգևատրվել են 9-րդ պատվավոր դանով: Նրանց թվում են ԱՄՆ-ի, Ինդոնեզիայի, Հոնդուրասի, Իսպանիայի, Խորվաթիայի և Պակիստանի նախագահները: Նա նաև նշել է, որ թեքվանդո պարապում են աշխարհի 205 երկրում՝ 70-80 միլիոն մարդ: