«Գրիշա Վիրաբյանն ընդդեմ Հայաստանի Հանրապետության» գործը նոր ընթացք է ստանում: ՄԻԵԴ-ի վճռի համաձայն՝ «Ժողովրդական կուսակցության» ակտիվիստ, ընդդիմադիր Գրիշա Վիրաբյանը ենթարկվել է խոշտանգումների: Այս ամենի հետ կապված՝ սեպտեմբերի 6-ին ներկայացվել է վճռաբեկ բողոք նոր հանգամանքով:
Հայտնի է, որ ՀՀ Վճռաբեկ դատարանը 60 օր ուշացումով է վարույթ ընդունել «Սիրունյան» իրավաբանական գրասենյակի ներկայացրած՝ Գ. Վիրաբյանի վերաբերյալ հարուցված քրեական գործը նոր հանգամանքների հիման վրա վերանայելու վերաբերյալ բողոքը: Այս մասին լրագրողների հետ հանդիպմանը տեղեկացրեց Հայաստանի փաստաբանների պալատի փաստաբան Ալեքսանդր Սիրունյանն ու իրավապաշտպան Արտակ Զեյնալյանը, որոնք Գրիշա Վիրաբյանի ներկայացուցիչներն են Վճռաբեկ դատարանում:
«Բողոքը ներկայացվել է, 10 օրում պարտավոր էին պատասխանել, սակայն 2 ամիս է՝ ձգձգվում է: Դեռ լուր չունենք, սպասում ենք: Պարտավոր էին հարուցել դատական ակտի վարման վարույթ»,- տեղեկացրեց Ա. Սիրունյանը՝ նշելով, որ գործի քննությունն անտեղի ձգձգվում է, և իրենք իրավական առումով առայժմ սպասում են:
Հարցին, թե մինչև ո՞ւր է գնալու գործը և որքան կտևի, բանախոսը դժվարացավ կոնկրետ պատասխան տալ: «Ինչքան կտևի՝ չգիտեմ, համեայն դեպս, 6 ամսից ոչ պակաս: Հայաստանը փորձելու է խույս տալ վճռից»,- ասաց նա:
«Իրականում քրեական գործ չկա, կա կոծկված խոշտանգումների դեպք»,- ասաց Սիրունյանը:
Արտակ Զեյնալյանն էլ իր հերթին հավելեց, որ ՄԻԵԴ-ի վճռի համաձայն՝ անմարդկային են վարվել Գրիշա Վիրաբյանի հետ, չի իրականացվել արդար քննություն: Արձանագրվել է, որ տեղի է ունեցել անմեղության կանխավարկածի խախտում, քանի որ «այն ակտը, որով կարճել են քրեական հետապնդումը Գրիշայի նկատմամբ, արձանագրում է, որ Գրիշա Վիրաբյանը թույլ է տվել հանցագործություն, մեղավոր է»:
Բանախոսի խոսքով՝ ստացվում է այնպես, որ Եվրոպական դատարանը ընդունել է խոշտանգումների փաստը, մեզանում՝ ոչ: «Եվրոպական դատարանը դա արձանագրել է, ինչը բեկանման ենթակա չէ: Նա հետապնդումների է ենթարկվել իր քաղաքական հայացքների համար: ՀՀ-ն պարտավոր է ընդունել, որ տեղի է ունեցել խախտում: Ուզում ենք, որ վերականգնվեն Գրիշա Վիրաբյանի իրավունքները»,- ասաց Ա. Զեյնալյանը:
Բանախոսները հայտնեցին, որ իրենք դիմել են Խոշտանգումների կանխարգումների կենտրոն, Եվրոպայի խորհրդի նախարարների կոմիտե:
Պատմությունն ունի վաղեմություն՝ վերաբերում է 2004թ. ապրիլի 12-13-ի դեպքերին, երբ Գրիշա Վիրաբյանին տանում են ոստիկանություն: Վերջինս դիմադրություն է ցուցաբերում, ինչի հետևանքով ստանում է բազմաթիվ վնասվածքներ, ընդուպ մինչև ամորձիներից մեկի հեռացում: Գրիշա Վիրաբյանի նկատմամբ հարուցված քրեական գործը՝ ոստիկանության ներկայացուցչի նկատմամբ բռնություն կիրառելու հոդվածը, այնուհետ կարճվում է:
Մարդու իրավունքների եվրոպական դատարանը 2012թ. հոկտեմբերի 2-ին հրապարակեց «Գրիշա Վիրաբյանն ընդդեմ Հայաստանի Հանրապետության» վճիռը: Նրա գործը Եվրադատարանի վարույթում էր դեռ 2005 թվականից: Գ. Վիրաբյանը Հայաստանի Հանրապետությունից ստացավ 31 հազար եվրո փոխհատուցում:
