Սաուդյան Արաբիայի մայրաքաղաք Էր-Ռիադում բացվել է Ritz-Carlton հինգ աստղանի հյուրանոցը, որում երեք ամիս պահում էին ձերբակալված տեղի արքայազններին և կառավարության անդամներին:
Ritz-Carlton հյուրանոցի մեկ օրն արժե 500 դոլար: Կոռուպցիայի մեջ մեղադրվող շեյխերին բաց են թողել, երբ նրանք իշխանությունների հետ գործարքի մեջ են մտել և համաձայնել են «փրկագին» վճարել պետական գանձարանին՝ 100 միլիարդ դոլարի չափով:
ԶԼՄ-ներին հաջողվել է զրուցել բանտից ազատված 62-ամյա միլիարդատեր, Twitter սոցկայքի մասնաբաժնի և ամերիկյան 21st Sentury Fox կինոկոմպանիայի սեփականատեր Ալ-Վալիդ իբն Թալալի հետ, ով թագավորի եղբորորդին է:
Արքայազնի խոսքերով՝ հյուրանոցի անձնակազմն ու անվտանգության աշխատակիցներն իր հետ լավ են վարվել: Արքայազնները հյուրանոցում անձնական կաբինետ ունեն, խոհանոց և ճաշարան: Բոլոր տարածքներում շեշտը դրված է ոսկու վրա: Երեք ամիս բանտարկության ընթացքում նա սնվել է հիմնականում բուսական սնունդով, իսկ բոլոր ըմպելիքները խմել է բացառապես սեփական լուսանկարով բաժակով:
Իր սենյակում նա հեռուստացույց է ունեցել, բացի այդ նրան թույլ են տվել ֆիզիկական վարժություններով զբաղվել: Արքայազնի ձերբակալությունը անսպասելի է եղել, քանի որ նա մի քանի անգամ հրապարակայնորեն սատարել է թագավորին և թագաժառանգին:
«Բայց, այնուամենայնիվ, իշխանությունները երևի թե ազդեցիկ բարեկամի մեջ հնարավոր մրցակից են տեսել՝ գահի համար պայքարում»,- նշում են փորձագետները:
