ՀԺԿ նախկին համակիր Գրիշա Վիրաբյանի վերաբերյալ տարիներ առաջ խոշտանգման փաստով հարուցված քրեական գործի քննությունը ավարտվել է, և գործն ուղարկվել է դատարան։ Այս մասին «Առաջին լրատվական»-ի հետ զրույցում ասաց Գրիշա Վիրաբյանը։
Հիշեցնենք, որ տարիներ առաջ, երբ Մարդու իրավունքների եվրոպական դատարանը հաստատված էր համարել 2004 թվականին Վիրաբյանի խոշտանգվելու փաստը, ՀՀ իրավապահ մարմիններին պարտավորեցրել էր քրեական գործ հարուցել և պատասխանատվության ենթարկել մեղավորներին։ Մի քանի անգամ քրեական գործ հարուցվել էր, ապա կարճվել։ Սակայն Վիրաբյանը բողոքարկում էր բոլոր կարճման որոշումները։ Վերջին անգամ էլ նրա պահանջը բավարարվել էր, և դատախազության ցուցումով գործը վերաբացվել էր, որով քննություն է իրականացվել և, փաստորեն, ուղարկվել դատարան։
Վիրաբյանը մեզ հետ զրույցում ասաց, որ բացարձակ գոհ չէ իրականացված քննությունից։ «Մենակ վաղեմության ժամկետն են հանել, ուրիշ բան չի արվել։ Իմ բոլոր միջնորդությունները՝ նորից փորձաքննություն նշանակելու մասով և այլն, մերժվել են։ Իրենք ոչ մի գործ էլ չեն արել և ամեն ինչ թողել են դատարանի վրա։ Բայց մեզ կոնկրետ հետաքրքրում է, թե ինչ մեղադրանք են առաջադրել, քանի որ համարում են, որ փաստաթղթերի կեղծում չի եղել, մինչդեռ փաստաթղթերի կեղծումը բացահայտ երևում է։ Գործի նյութերում հոդված է նշված, որը սխալ է, քանի որ խոշտանգման փաստը ՄԻԵԴ-ն արդեն ապացուցված է համարում։ Մերժել են նաև Երևանի նախկին ոստիկանապետ Աշոտ Կարապետյանի հետ առերեսման միջնորդությունը։ Ես միջնորդել էի նաև, որ հարցաքննության կանչեն Աղվան Հովսեփյանին, Արամ Սարգսյանին և Ստեփան Դեմիրճյանին, սակայն դրանք էլ են մերժվել։ Այսինքն՝ ըստ էության, ոչ մի քննություն էլ չի կատարվել։ Ժամանակի վրա են խաղում»,- ասաց Վիրաբյանը՝ հավելելով. «Սա Գևորգ Կոստանյանի ձեռագիրն է։ Եվ ես պատրաստվում եմ Կոստանյան Գևորգին և Արտակ Զեյնալյանին դատի տալ ինձ կաշառք առաջարկելու համար։ Ես բոլոր փաստերն ունեմ, ապացույցները ունեմ։ Եթե հասցնեմ՝ այսօր, եթե ոչ՝ վաղը կդիմեմ ԱԱԾ և Քննչական կոմիտե»։
Հիշեցնենք, որ Գրիշա Վիրաբյանը վերջերս հայտարարեց, որ ԱԺ պատգամավոր, նախկին Գլխավոր դատախազ և ՄԻԵԴ-ում ՀՀ կառավարության ներկայացուցիչ Գևորգ Կոստանյանը և իր արդեն նախկին փաստաբան Արտակ Զեյնալյանը իրեն հանդիպման են կանչել, և այդ հանդիպման ժամանակ Կոստանյանը Վիրաբյանին առաջարկել է որոշակի գումարի դիմաց հրաժարվել ՄԻԵԴ որոշումից բխող մնացած քայլերից, քրեական գործից։ Վիրաբյանը, սակայն, իր խոսքով, մերժել էր Կոստանյանի առաջարկը։
