Շվեդիան և Շվեյցարիան համատեղ քարոզարշավ են մեկնարկել` չինացի զբոսաշրջիկներին իրենց տարբերությունների մասին պատմելու համար` գրում է The Telegraph-ը:
Թերթը նշում է, որ ՉԺՀ-ի բնակիչները հաճախ են շփոթում այդ երկու երկրները, որոնցից մեկը հայտնի է ABBA խմբով, IKEA և Volvo ընկերություններով, իսկ մյուսը` շոկոլադով, պանրով և ժամացույցով: Շփոթմունքի պատճառը այս 2 պետությունների չինարենում նման գրությունն է:
Արդյունքում Շանհայում գտնվող Շվեդիայի և Շվեյցարիայի հյուպատոսարանները մրցույթ են կազմակերպել և ՉԺՀ-ի բնակիչներին առաջարկել են զվարճալի միջոցներ մտածել` այդ 2 երկրների միջև տարբերությունը բացատրելու համար: Պատասխաններն ընդունվում են մինչև նոյեմբերի 20-ը` նկարների, լուսանկարների, կարճամետրաժ ֆիլմերի և այլ միջոցներով:
Հաղթողները 12 օրով կմեկնեն այս եվրոպական երկրներ՝ ճամփորդության, որից հետո կներկայացնեն իրենց տպավորությունները:
Բացի այդ, քարոզարշավի կազմակերպիչները պատկերանիշ են ստեղծել, որտեղ պատկերված են Շվեդիայի և Շվեյցարիայի քարտեզները և դրանց հետ ասոցացվող մարդիկ ու առարկաներ:
