Սևանա լճի թռչնաշխարհի պոպուլյացիան դեռևս չի վերականգնվել նախորդ տարվա ձմռան խստաշունչ սառնամանիքների հետևանքով ստեղծված ծանրագույն իրավիճակից:
Ինչպես տեղեկացրել է «Սևան Ազգային պարկ»-ի պահպանության բաժնի աշխատակից, Թռչունների պահպանության միության Գեղարքունիքի մարզի խնամակալ Արտակ Սարգսյանը, նախորդ ձմռանը Սևանա լճի սառցակալումը, իրենց կողմից կատարված դիտարկումների համաձայն, մոտ 40 տոկոսով կրճատել է Սևանա լճում բնադրող թռչունների քանակությունը, իսկ առայժմ, չնայած եղանակի տաքությանը, չեն երևում Սևան չուի եկող թռչնատեսակները:
«Նախորդ տարիների համեմատ շատ քիչ խմբաքանակներով երևում են կռնչան բադը, սև փարփարը, կարմրագլուխ սուզաբադը, մեծ սղոցակտուց բադը:2017 թվականի ձմեռը, հիրավի, կատարյալ աղետ եղավ Սևան լճի թռչնաշխարհի համար, նույնիսկ այն աստիճան, որ հազարավոր թև թռչուններ ոչնչացան կամ, մեծ խմբերով կուտակվելով գետաբերաններում, դարձան կեր վայրի կենդանիների համար:
Կարծում եմ, որ առայժմ խաթարված է Սևանի թռչնաշխարհի գարնանային չուն, քանի որ չենք նկատում մեզ մոտ գարնանն ընդառաջ չուի եկող ոչ մի թռչնատեսակ: Դա կարող է բացատրվել նրանով, որ այդ թռչնատեսակների մի մասը ոչնչացել են նախորդ ձմռան սառնամանիքներից կամ եթե հրաշքով կարողացել են պոկվել արհավիրքից, խուսափում են նույն վայրերում չու կատարելուց:
Այժմ մենք պահպանության բաժնի աշխատակիցներով պահպանություն ենք իրականացնում լճի ափամերձ բոլոր հատվածներում:Միակ դրական բանն այն է, որ այս տարվա եղանակները նպաստավոր են Սևանա լճի թռչնաշխարհի պոպուլյացիայի վերականգնման համար, նախորդ տարվա ծանրագույն իրավիճակի կրկնություն չի լինելու, և մնում է հուսալ, որ կորուստները մասամբ կարող են վերականգնվել այս տարվա ընթացքում»»-ներկայացրեց Արտակ Սարգսյանը: