Հաագայի միջազգային քրեական դատարանը նախնական հետաքննություն է սկսել Ֆիլիպինների նախագահ Ռոդրիգո Դուտերտեի նկատմամբ, ով 2016 թվականի հուլիսին «թմրանյութերի դեմ պատերազմ» էր հայտարարել, որին զոհ է գնացել ավելի քան 4000 մարդ։ Այս մասին հաղորդում է Reuters գործակալությունը։
Դատախազ Ֆատու Բենսուդան բացատրել է, որ հետաքննությունը պետք է պարզի, արդյոք մարդկության դեմ հանցագործություն է իրականացվել և արդյոք կասկածյալներին դատարանի առաջ կանգնեցնելը Հաագայի դատարանի իրավասությունների մեջ է մտնում։
Ֆիլիպինների նախագահի ներկայացուցիչը նշել է, որ Բենսուդայի հայտարարության մեջ նշված չեն կոնկրետ կասկածյալները և հավաստել է, որ այս ակցիան Հաագայի դատարանի համար «ժամանակի և ռեսուրսների անիմաստ» վատնում է դառնալու։
Նրա խոսքերով՝ Դուտերտեն պատրաստ է կանգնել դատարանի առջև և նույնիսկ «փտել բանտում», միայն թե փրկի Ֆիլիպինները թմրանյութերի վաճառքով զբաղվողների հանցագործություններից։
Ֆիլիպինյան ոստիկանները հավաստում են, որ այդ սպանությունները իրականացվել են թմանյութերի մաֆիայի դեմ օրինական գործողությունների ժամանակ, իսկ կասկածյալները ընդդիմացել են կալանավորմանը։
Անցած տարվա օգոստոսին Դուտերտեն հայտարարել էր, որ ոստիկանության աշխատակիցներն իրավունք ունեն սպանել այն «ապուշներին», ովքեր փորձում են դիմադրություն ցուցաբերել կալանավորման ժամանակ, որոնք տեղի են ունենում թմրանյութերի վաճառքի դեմ պայքարի շրջանակներում։
