ԱՄՆ պաշտպանության նախարար Չակ Հեյգելը հրաման է ստորագրել «Ջորջ Վաշինգտոն» ավիակիրը Ֆիլիպինների ափ ուղարկելու մասին. այն «Յոլանդա» ավերիչ թայֆունից հետո կմասնակցի փրկարարական և վերականգնողական աշխատանքներին: Այս մասին հաղորդում է Reuters գործակալությունը՝ վկայակոչելով Պենտագոնի հայտարարությունը:
Հայտարարության մեջ նշվում է, որ ավիակիրը, որը Հոնկոնգի նավահանգիստ է ժամանել ուրբաթ և այնտեղ պետք է մնար հինգ օրը, նավահանգիստն ավելի շուտ կլքի: Ավիակիրը և ԱՄՆ ռազմա-ծովային ուժերի այլ նավեր Ֆիլիպինների ափերին պետք է մոտենան 2-3 օրվա ընթացքում:
Պենտագոնի տվյալներով՝ ԱՄՆ-ը ավիատեխնիկա կտրամադրի` տուժածներին որոնելու և փրկելու համար, միջին և ծանր ուղղաթիռներ՝ տարհանման համար և բեռնափոխադրումների համար նախատեսված ինքնաթիռներ:
«Յոլանդա» թայֆունը Ֆիլիպինների կենտրոնական մասում մոլեգնել է ուրբաթ: Ավելի վաղ հաղորդվել էր, որ բնական աղետը խլել է ավելի քան 1800 մարդու կյանք: Որոշ տվյալներով՝ զոհվածների թիվը հնարավոր է հասնի 10 հազարի:
