Գագիկ Ծառուկյանը «Հայաստանը և ՅՈւՆԵՍԿՕ»-ն վերնագրով գիրք է գրել. այս մասին տեղեկացնում է Ինֆորմատիզացիայի միջազգային ակադեմիայի (International Informatization Academy) կայքէջը (iia.ca):
Կայքը ԲՀԿ առաջնորդ Գագիկ Ծառուկյանի կենսագրականը ներկայացնելուց բացի որոշակի իմֆորմացիա է տալիս գրքի բովանդակության մասին, ըստ որի` Ծառուկյանը, հիմնվելով պատմական և վիճակագրական փաստերի վրա, անդրադարձ է կատարում Հայաստան- «ՅՈւՆԵՍԿՕ» կապին, մերօրյա Հայաստանի պատմությանը, լեզվին, գիտությանը, կրթությանը և այլ կարևորագույն ոլորտներին:
Աղբյուրից տեղեկանում ենք նաև, որ գիրքը պետք է հնարավոր լիներ ձեռք բերել 2011 թվ. հունվարի 1-ից:
Արդեն նյութի հրապարակումից հետո վերոնշյալ կայքում տեղի է ունեցել տեքստի փոփոխություն, ըստ որի` Ծառուկյանը ոչ թե գրքի հեղինակն է, այլ դրա նախաձեռնողն ու ոգեշնչողը (initiated, inspired by Gagik Tsarukyan): Քանի որ անհարկի շահարկումներ են տեղի ունենում այն մասին, իբր մենք և այլ ԶԼՄ-ներ խեղաթյուրել ենք իրականությունը և ապատեղեկատվություն տարածել, հարկ ենք համարում հրապարակել մեր կողմից նախապես արված screen shot-ը, որտեղ երևում է այն տեքստը, ինչին հղում կատարելով էլ գրվել է այս լուրը: