«Սասնա ծռեր» զինված խմբի անդամ Պավել Մանուկյանի՝ դատավոր Արտուշ Գաբրիելյանին «Ցռան մոզի» անվանելու գործով առաջին նիստին Մանուկյանի պաշտպան Հարություն Բաղդասարյանը նախագահող դատավոր Սերգեյ Մարաբյանին ինքնաբացարկի միջնորդություն է ներկայացրել։ Պաշտպանի կարծիքով՝ քրեական գործը ընդհանրապես չպետք է դատարան հասներ ու վարույթ ընդունվեր, այդ իսկ պատճառով դատավորը պարտավոր է ինքնաբացարկ հայտնել։
«Արտուշ Գաբրիելյանը այդ օրը Պավլիկ Մանուկյանին դատարանից 10 ժամով հեռացնելու սանկցիա է կիրառել, այսինքն՝ կա դատարանի ուժի մեջ մտած օրինական որոշում կոնկրետ անձի արարքը պատժելու վերաբերյալ եւ սահմանադրական իրավաբանական նորմերը թույլ չեն տալիս անձին կրկնակի պատժի ենթարկել, քանի որ նոր հանգամանքներ ի հայտ չեն եկել։ Նաև Արտուշ Գաբրիելյանը պետք է ճանաչվեր գործով տուժող, ինչը բացակայում է, այսինքն՝ քրեական գործ հարուցելու հիմա չկա։ Տուժողի բողոք չկա հետևաբար քրեական գործը պետք է կարճել»,–ասել է Հարություն Բաղդասարյանը։
