«Մինչ այժմ ավագանու կազմում մենք միայն գրավոր տարբերակով էինք աշխատում, իսկ հիմա քաղաքապետարանի տարբեր բաժինների հետ ուղղակի հանդիպումների, քննարկումների միջոցով փորձում ենք հասկանալ խնդիրները և վերլուծությունների միջոցով ավելի արդյունավետ առաջարկներ և լուծումներ գտնել»,- «Առաջին լրատվական»-ի հետ զրույցում ասաց Վանաձորի ավագանու «Լուսավոր Հայաստան» խմբակցության ղեկավար Քրիստ Մարուքյանը՝ անդրադառնալով ավագանու իշխանական խմբակցությունների հետ համատեղ աշխատանքի վերաբերյալ մեր հարցին։
Մարուքյանը նշեց, որ ընդամենը մեկ նիստ է եղել համատեղ մասնակցությամբ։ Այս օրերին իրենք փորձում են մասնակցել հաջորդ նիստի կազմման աշխատանքներին։ «Այս պահին մյուս խմբակցությունների հետ համագործակցության թեմա կամ առիթ չկա։ Հիմա բաժինների աշխատանքի վերլուծության, ուղղորդելու հարցն է, որը խմբակցություններից կախված հարց չէ։ Այդ հարցերը չեն գնալու քվեարկության, որոնց շուրջ պետք է պայմանավորվածություններ ձեռք բերել։ Եթե լինեն նման հարցեր, կլինեն նաև նման պայմանավորվածություններ»,- նշեց Մարուքյանը։
Մարուքյանը նշեց նաև, որ այս տարբերակով աշխատելը ավելի արդյունավետ է, և առաջիկայում այն կտա իր արդյունքը։ «Հունվարը կիսատ ամիս էր, այդ ընթացքում դժվար էր շատ բան անել։ Բայց այն ամուր հիմքերը, որ կան լավ աշխատանքի համար, դրված են, և հաստատ դրանք իրենց արդյունքները կտան»։
Մարուքյանը նշեց, որ ավագանու կազմում աշխատելու որոշում կայացնելուց հետո Վանաձորի քաղաքապետի և ՀՎԿ անդամ փոխքաղաքապետ Արկադի Փելեշյանի հետ առանձնապես հանդիպում, շփում չի եղել։ Ընդամենը մեկ նիստ է տեղի ունեցել։ Հիմա պատրաստվում են հաջորդին։
Նշենք, որ բոյկոտից հետո ավագանու կազմում լիարժեք աշխատելուց բացի՝ ավագանու ԼՀԿ-ի անդամները շարունակում են գրավոր եղանակով աշխատել քաղաքապետի հետ։ Մասնավորապես նորից գրություն են ուղարկել քաղաքապետին՝ պարզելու Վանաձորի գրադարանների գրքերի, գույքի ճակատագիրը։ «Մոտ 40 մլն դրամի համայնքային գույք ոչնչացվել է, և մինչև հիմա պատասխանատուները հայտնի չեն»,- գրել է ավագանու անդամ Արմեն Եղիազարյանը։
