Ժնևում ավարտվել է իրանական միջուկային ծրագրի շուրջ Իսլամական Հանրապետության և «վեցյակի» բանակցությունների երկրորդ օրը: Ռուսաստանի, ԱՄՆ-ի, Չինաստանի, Ֆրանսիայի, Մեծ Բրիտանիայի և Գերմանիայի դիվանագետները իրանցի գործընկերների հետ քննարկում են մոտ մեկ ամիս առաջ այդ առնչությամբ Թեհրանի ներկայացրած նոր առաջարկները:
Երկխոսության ընթացքը մամուլի համար մեկնաբանել են Վաշինգտոնում: Ինչպես ընդգծել են Սպիտակ տանը, ծրագրվում է պահպանել պատժամիջոցային ռեժիմի գործող կառուցվածքը, և պատժամիջոցների ցանկացած մեղմացում կկրի շրջելի բնույթ: ITAR-TASS-ի փոխանցմամբ՝ այս մասին հայտնել է Սպիտակ տան ներկայացուցիչ Ջոշ Էռնեստը:
«Այդ ռեժիմը ծայրաստիճան կարևոր դեր է խաղացել իրանցիներին բանակցային սեղանի շուրջ նստեցնելու գործում,- ասել է Էռնեստը:-Այդ ռեժիմը վիթխարի դժվարություններ է առաջացրել իրանական տնտեսության և իրանական ղեկավարության համար: Հենց այդ պատճառով էլ մենք այժմ վարում ենք այս զրույցը»: Նա նշել է, որ դեռևս որևէ գործարք չկա, սակայն կա դիվանագիտական լուծման հնարավորություն, որին էլ իրենք ձգտում են:
Ինչպես սպասվում է, այսօր ժնևյան բանակցություններին կմիանան «վեցյակի» մի շարք երկրների դիվանագիտական գերատեսչությունների ղեկավարներ: Այնտեղ սպասում են Լորան Ֆաբիուսին (Ֆրանսիա),Վան Իին (Չինաստան), Ջոն Քերիին (ԱՄՆ): Ռուսաստանի ԱԳՆ-ի աղբյուրը հայտարարել է, որ Սերգեյ Լավրովը նույնպես մտադիր է շաբաթ այցելել Ժնև: