ԱՄՆ Պետդեպի ներկայացուցիչները հաստատել են, որ Իրանի և «վեցյակի» միջև իրանական միջուկային խնդրի շուրջ ժնևյան բանակցությունները կշարունակվեն նաև այսօր: Այս մասին հայտնում է France Presse-ը:
ԱՄՆ պետքարտուղար Ջոն Քերին ավելի վաղ հայտարարել էր, որ իր եռակողմ բանակցությունները Իրանի արտգործնախարար Մուհամմադ Ջավադ Զարիֆի և «վեցյակի» համակարգող Քեթրին Էշթոնի հետ ավարտվել են, սակայն աշխատանքը շարունակվում է: Այն մասին, որ բանակցությունները կշարունակվեն նաև շաբաթ, հայտարարել է նաև Իրանի փոխարտգործնախարար Աբաս Արաքչին:
Օբաման զանգահարել է Իսրայելի վարչապետ Բենիամին Նեթանյահուին և տեղեկացրել նրան Ժնևում ընթացող բանակցությունների ընթացքի մասին: Այս մասին հայտնել է Սպիտակ տունը: Օբաման ընդգծել է Իրանի ձեռքում միջուկային զենքի հայտնվելը թույլ չտալու կոշտ վճռականությունը, ինչը ներկայիս բանակցությունների նպատակն է:
Նեթանյահուն ավելի վաղ հայտարարել էր, որ Իսրայելը լիովին մերժում է պայմանավորվածությունը իրանական միջուկային դոսյեի շուրջ, որը քննարկվում է Ժնևում: Նեթանյահուի խոսքով՝ այդ համաձայնագիրը վերջ կտա հակամարտության խաղաղ կարգավորման հնարավորությանը: Սպիտակ տունը քննադատությունը համարում է վաղաժամ, քանի որ դեռևս ոչ մի պայմանավորվածություն չկա:
