Քիչ առաջ Արարատ քաղաքում ավարտվեց քաղաքապետի ՀՀԿ-ական թեկնածուի հանրահավաքը, որին ներկա էին ԱԺ նախագահ Հովիկ Աբրահամյանը, Արարատի մարզպետ Արամայիս Գրիգորյանը և այլք:
ՀՀԿ թեկանծու Հայկ Հայկյանը նախ շնորհակալություն հայտնեց բոլոր արարատցիներին, իրենց թանկագին ժամանակը հանրահավաքին տրամադրելու համար ապա նշեց, որ ապրել է և շարունակելու է ապրել Արարատում: Նա նաև ասաց, որ քաղաքապետ դառնալու դեպքում աշխատելու է գործունյա մարդկանց հետ: Ամենակարևոր խնդիրներից մեկն, ըստ նրա, գործարանների վերադարձն է լինելու, որոնք թեև նախկինում Արարատում են եղել, սակայն հիմա հանգրվանել են այլ տեղ: ««Զալատոյ»-ի խնդիրն է, որը պետք է վերադարձնենք արարատցիներին»,- ասաց նա՝ հավելելով, որ բացի այդ՝ պետք է վերագործարկեն կոմունալ ծրագրերը:
ՀՀԿ-ական թեկնածուն նշեց, որ քաղաքն ուսանողներին ավտոբուսներ է տրամադրելու և որևէ կուսակցության չի պատկանելու: Նա նաև ասաց, որ այսօր ինքն արարատցիների կարիքն ունի, և խնդրեց իրեն ձայն տալ:
Նոյեմբերի 10-ին Արարատ քաղաքում տեղի կունենան Արարատի քաղաքապետի ընտրություններ, որոնցում պայքարը կընթանա երկու թեկնածուների՝ ՀՀԿ-ական Հայկ Հայկյանի և ԲՀԿ-ական Սամվել Բարսեղյանի միջև:
