Ֆրանսիական «Յառաջ» պարբերականի փոխանցմամբ՝ Թուրքիայի Ամասիա նահանգի Մարզվան (ներկայիս՝ Մերզիֆոն) քաղաքում բացվել է այդ շրջանի լուսանկարիչ՝ հայտնի Դիլդիլյան եղբայրների լուսանկարների ցուցահանդեսը, որն ընդգրկում է 1872-1923թթ. ժամանակաշրջանը:
Նախաձեռնության հեղինակն է Դիլդիլյան ընտանիքի երրորդ սերնդի անդամ Արմեն Ցոլակ Մարսուբյանը: Նա ընտանեկան արխիվներից հանել է իր նախնիների՝ Ցոլակ և Արամ Դիլդիլյան եղբայրների՝ Սեբաստիայում, Մարզվանում, Սամսունում, Գոնիայում և Ամասիայում կատարած և պատմական բացառիկ նշանակություն ունեցող 600-ից ավելի լուսանկարները: Այս տարվա ապրիլին դրանք արդեն ցուցադրվել էին Պոլսում:
Այս գործերը Ցոլակ և Արամ Դիլդիլյանների հայրենի քաղաքում՝ Մարզվանում, ցուցադրվում է առաջին անգամ:
Ցուցահանդեսի բացմանը ներկա էին Մարզվանի քաղաքապետ Իսքենդեր Դողրուն, պաշտոնատար այլ անձինք:
Ցոլակ և Արամ Դիլդիլյան եղբայրների և նրանց քրոջ, իր մոր՝ Հայկանուշի հուշերը հաջորդ սերունդներին է փոխանցել Մարիձա Մետաքսյանը: Վերջինիս եղբորորդին էլ՝ ֆրանսաբնակ Հայկ Տեր-Հարությունյանը, այդ հուշերը վերջերս մեկտեղել էր ֆրանսերեն Une enfance à Marzevan խորագրով գրքում:
Թուրքական մամուլը այս առթիվ սյունակներ էր տրամադրել Դիլդիլյան ընտանիքի շառավիղների՝ երկիր վերադարձին: Դրանցից է «Թարաֆ» թերթում լույս տեսած հոդվածը՝ «Իրենց իսլամացրած մեծ հոր տան մեջ» խորագրով: «Փոխանակ մեռնելու, մահմեդականացումը ընտրած 17 հայեր երկու տարի նկուղում են ապրել» ենթախորագրում թերթը ներկայացնում է Դիլդիլյան գերդաստանի ոդիսականը՝ բացատրելով. «Մերզիֆոնցի Դիլդիլյան ընտանիքը 90 տարի հետո լուսանկարներով վերադարձավ իր հայրենիք, որտեղից հեռացել էր 1915-ի ջարդից 8 տարի հետո: Ընտանիքի երեք թոռները՝ պրոֆ. դոկտոր Արմեն Ց. Մարսուպյանը, Հայկ Տեր-Հարությունյանն ու Ռաշել Դիլդիլյանը իրենց մեծ հայրերի լուսանկարները ներկայացրել են Մերզիֆոնի Թաշհանի իրենց հայրենակիցներին…»:
Այս լուսանկարների ցուցահանդեսը «վկայություններ են՝ մի հայ ընտանիքի կորուսյալ անցյալի մասին»:
