Մայրաքաղաքի Վլադիմիր Մայակովսկու անվան թիվ 7 հիմնական դպրոցի հիմնադրման 80-ամյակի առթիվ Երևանի պետական կամերային թատրոնում կազմակերպվել է կրթօջախի հոբելյանին նվիրված միջոցառում:
Ինչպես տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, ցերեկույթի ընթացքում դպրոցի ուսուցչական անձնակազմն ու աշակերտները ներկայացրել են դպրոցի 80-ամյա պատմությունը, անցած ուղին, հաջողություններն ու այս տարիների ձեռքբերումները:
Միջոցառմանը ներկա են գտնվել Երևանի քաղաքապետի տեղակալ Արամ Սուքիասյանը, ՀՀ-ում ՌԴ և Վրաստանի դեսպանության ներկայացուցիչներ, պաշտոնատար այլ հյուրեր, Երևանի ավագանու անդամ, դպրոցի շրջանավարտ Արա Երնջակյանը, ինչպես նաև դպրոցի այլ շրջանավարտներ, ովքեր, մշակույթի, հեռուստատեսության և մի շարք այլ բնագավառներում մասնագիտական հաջողությունների հասնելով, իրենց ներդրումն են ունեցել դպրոցի զարգացման գործում:
Շնորհավորելով դպրոցի ուսուցչական անձնակազմին և աշակերտներին՝ Արամ Սուքիասյանն ընդգծել է կրթօջախի ուրույն դերը սերունդների կրթության և դաստիարակության գործում և մաղթել դպրոցին նորանոր հաջողություններ:
Միջոցառման ավարտին դպրոցի 80-ամյա հոբելյանի առիթով սովորողների կրթության և դաստիարակության գործում ներդրած ավանդի համար Մայակովսկու անվան թիվ 7 հիմնական դպրոցի մանկավարժներ Նարինե Ղազանչյանը և Իննա Պապովյանը պարգևատրվել են Երևանի քաղաքապետի պատվոգրով:
