Վերաքննիչ քրեական դատարանի վարույթում է Վահագն Գրիգորյանի գործով բերված վերաքննիչ բողոքի քննությունը:
Գործը քննել է Սյունիքի մարզի ընդհանուր իրավասության դատարանը Դավիթ Գրիգորյանի նախագահությամբ:
21-ամյա Վահագն Գրիգորյանը ժամկետային զինծառայող է, շարքային:
Ըստ դատական ակտի՝ Գրիգորյանը 2013 թվականի հունիսի 5-ին, առավոտյան ժամը 9-ին զորամասի ֆուտբոլի դաշտի հարակից տարածքում անցկացվող պարապմունքին մասնակցելու փոխարեն պառկել է խոտերին ու չի կատարել իր պարտականությունները:
Շարքային Գրիգորյանին դիտողություն է արել դասակի հրամանատար, լեյտենանտ Ա. Հ.-ն:
Վահագն Գրիգորյանը, սակայն, ըստ դատական ակտի, անպարկեշտ կերպով ստորացրել է լեյտենանտի պատիվն ու արժանապատվությունը և վաշտի անձնակազմի ներկայությամբ նրա դիտողություններին պատասխանել է. «Արա՛, կարողա՞ դու լավ չես, ինձ խառնում ես ուրիշների հետ»:
Ապա «բոլորից տարբերվող» զինվորը պառկած տեղից վեր է կացել, մոտեցել լեյտենանտին, բռնել նրա համազգեստից ու քաշքշել:
Լեյտենանտը շարքային Վահագն Գրիգորյանին ներկայացրել է վերադաս հրամանատարին:
Սպայական սենյակ է մտել ավագ լեյտենանտ Ա. Մ.-ն, տեղեկացել Գրիգորյանի արարքի մասին ու ցանկացել է դիտողություն անել նրան, բայց Գրիգորյանն ավագ լեյտենանտին էլ «չի խնայել»: Ասել է. «Ս… քաշի ստեղից, մի հատ էլ խառնվեցիր, վատ ա ըլնելու»:
Ըստ դատական ակտի՝ Վահագն Գրիգորյանն իրեն «առանձնաշնորհյալ» է համարել ոչ միայն լեյտենանտների, այլ նաև համածառայող շարքայինների հանդեպ:
2013 թվականի հունիսի 5-ից մինչև 13-ն ընկած ժամանակահատվածում Գրիգորյանը բռնի գործողություններ է կատարել շարքային Ա. Ղ.-ի նկատմամբ, հալածել ու ծաղրել է նրան:
Ըստ դատական ակտի՝ Վահագն Գրիգորյանը շարքում քայլելու ժամանակ ոտքերով ու ձեռքերով հարվածել է ծառայակցի մարմնին, հայհոյանքներ է տվել նրա հասցեին, զորամասի ճաշարանում հացի խմորից գնդիկներ է սարքել ու դրանցով հարվածել զինվորի գլխին ու մարմնին, ձևացնելով, թե քնած է՝ ձեռքերով պարբերաբար հարվածներ է հասցրել նույն զինվորի գլխին ու դեմքին, զորամասի հրաձգարանում բռնել է նրա պարանոցից, վայր է գցել, ապա նստել վրան:
Զինվորը, հոգեպես ճնշված ու վախեցած լինելով, նախընտրել է քնել ուրիշ վաշտի ննջարանում, որպեսզի խուսափի Գրիգորյանի հետ հանդիպելուց ու նրա սպառնալիքների իրականացումից:
Վահագն Գրիգորյանն ընդհանուր իրավասության դատարանում իրեն լիովին մեղավոր է ճանաչել ու միջնորդել է, որ գործը քննվի արագացված ընթացակարգով:
Դատարանը Վահագն Գրիգորյանին մեղավոր է ճանաչել ՀՀ քրեական օրենսգրքի 359 հոդվածի 1-ին, 360 հոդվածի 2-րդ մասով նախատեսված 2 դրվագով հանցագործություններ կատարելու համար ու վերջին հաշվով դատապարտել է պատժի՝ 6 ամիս կարգապահական գումարտակում պահելու ձևով:
Պատժի սկիզբը կհաշվվի Գրիգորյանին փաստացի արգելանքի տակ վերցնելու պահից:
Այս դատավճռի դեմ վերաքննիչ բողոք է բերել մեղադրող Վ. Շելելենկյանը, ում կարծիքով Վահագն Գրիգորյանի նկատմամբ դատարանը մեղմ է եղել, նրա արարքներին համաչափ՝ պետք է սահմանվեր ավելի խիստ պատիժ:
