Օրերս տեղեկություններ տարածվեցին, թե հրապարակվել է Արևելյան գործընկերության վիլնյուսյան գագաթնաժողովի ամփոփիչ հռչակագրի նախագիծը, որում Հայաստան-Եվրամիություն հարաբերություններին վերաբերող հատվածը դատարկ է:
«Առաջին լրատվական»-ին խնդրանքով ԵՄ ընդլայնման և եվրոպական հարևանության քաղաքական հարցերով հանձնակատար Շտեֆան Ֆյուլեի օգնական Պիտեր Ստանոն անդրադարձավ Վիլնյուսյան ամփոփիչ հռչակագրի տեքստին, որի մասին այդքան խոսվում էր, և որի վերաբերյալ տեղեկատվական արտահոսք տեղի ունեցավ:
Նա տեղեկացրեց, որ հռչակագիրը պետք է համաձայնեցվի և հրապարակվի հենց Արևելյան գործընկերության Վիլնյուսում կայանալիք գագաթնաժողովի ընթացքում: Ուստի, նրա համոզմամբ, կարիք չկա նույնիսկ անդրադառնալ այն բոլոր շահարկումներին և պնդումներին, թե դա հռչակագրի սևագիրը կամ հաստատված, բայց արտահոսքի ենթարկված տեքստն է: Ըստ նրա` Վիլնյուսյան գագաթնաժողովի հռչակագիրը վերաբերելու է ԵՄ Արևելյան գործընկերության բոլոր անդամ երկրների` Հայաստանի, Ադրբեջանի, Բելառուսի, Վրաստանի, Մոլդովայի և Ուկրաինայի հետ հարաբերություններին: Ի հավելումն, նրա խոսքով, իրենք լիահույս են, որ հնարավոր կլինի ստորագրել Ասոցացման համաձայնագիրը, այդ թվում` Խորը և համապարփակ ազատ առևտրի գոտու պայմանագիրը Ուկրաինայի, Վրաստանի և Մոլդովայի հետ:
Անդրադառնալով հայաստանյան խոսակցություններին, թե Վիլնյուսում Հայաստան-ԵՄ հարաբերությունների հռչակագիր է սպասվում` Փ. Ստանոն ասաց, որ բազմիցս են կրկնել, թե Վիլնյուսում հնարավոր չի լինելու Հայաստանի հետ Ասոցացման համաձայնագիր ու Խորը և համապարփակ ազատ առևտրի գոտու պայմանագիր նախաստորագրել Հայաստանի Մաքսային միությանն անդամակցությունից բխելիք հակասությունների պատճառով: Միևնույն ժամանակ, նա հիշեցրեց, որ իրենք հայտարարել են Հայաստանի հետ իրենց հարաբերությունները շարունակելու հետաքրքրության մասին` այս պայմաններում այդ հարաբերությունները կառուցելով այն ամենի վրա, որը ձեռք է բերվել համագործակցության արդյունքում:
«ԵՄ-ն ցանկանում է շարունակել Հայաստանի հետ սերտ աշխատել, և մենք մշտական շփումների մեջ ենք` որոշելու մեր հարաբերությունների հետագա լավագույն ճանապարհը և համագործակցությունը դեպի առաջ: Մենք սպասում ենք մեր գործընկերներից լսել նրանց գաղափարները, լսել, թե ինչպես են նրանք ցանկանում հստակեցնել նոր հիմքը մեր հարաբերությունների համար, որտեղ Ասոցացման համաձայնագիր ու Խորը և համապարփակ ազատ առևտրի գոտու պայմանագիր հնարավոր չէ»,- պարզաբանեց Պիտեր Ստանոն:
Մեր հարցին` Մինսկում կայացած ԱՊՀ ղեկավարների գագաթնաժողովի ընթացքում պարզ դարձավ, որ Ղազախստանն ու Բելառուսը դեմ են Հայաստանի անդամակցությանը Մաքսային միությանը, Հայաստանը այդ միությանը չմիանալու դեպքում կկարողանա՞ վերադառնալ Ասոցացման օրակարգին, Ստանոն արձագանքեց` ասելով, որ իրենք չեն մեկնաբանում հիպոթետիկ բնույթ կրող սցենարներ` ՙինչ կլինի, եթե՚: ՙՄենք գործ ենք ունենում փաստերի հետ, իսկ փաստն այն է, որ Ասոցացման համաձայնագրի ու Խորը և համապարփակ ազատ առևտրի գոտու պայմանագրի շուրջ երեքից ավելի տարվա բանակցություններից հետո Հայաստանը վերջիվերջո որոշեց միանալ Մաքսային միությանը: Այս պայմաններում փնտրում ենք ճանապարհներ` ինչպես զարգացնել մեր հարաբերությունները Հայաստանի հետ` հարգելով ՀՀ որոշումը և կառուցելով այն ամենի վրա, որին հասել ենք»,- ասաց ԵՄ ընդլայնման և եվրոպական հարևանության քաղաքական հարցերով հանձնակատար Շտեֆան Ֆյուլեի օգնականը:
