ԱՄՆ փոխնախագահ Ջոզեֆ Բայդենը Բոստոնի քաղաքապետի ընտրություններում հաղթանակի կապակցությամբ շնորհավորել է ոչ այն Մարտին Ուոլշին՝ գրում է ամերիկյան Boston.com պորտալը:
Բոստոնի քաղաքապետի ընտրությունների արդյունքները հայտնի դառնալուց մի քանի րոպե անց հնչել է Մարտին Ուոլշի բջջայինի զանգը: «Այ քեզ բան, Մարտին, դու արեցիր դա»,- լսափողի մեջ բղավել է Բայդենը, որը սխալմամբ զանգել է ոչ այն Ուոլշին, այլ ԱՄՆ սենատոր Էդվարդ Քենեդու նախկին օգնականին:
Ներկայում քաղաքապետի անվանակիցը զբաղեցնում է բոստոնյան ընկերության՝ կառավարական կապերի գծով նախագահի պաշտոնը:
Երբ նրան զանգել է Բայդենը, Ուոլշը եղել է տանը ու հեռուստացույցով հետևել է ընտրությունների արդյունքները: Նա շնորհակալություն է հայտնել Բայդենին ջերմ խոսքերի համար, ապա հայտնել սխալի մասին:
«Իսկական» Մարտին Ուոլշը այդ ժամանակ գտնվել է հյուրանոցում ու տոնել ընտրություններում տարած հաղթանակը:
