Վերաքննիչ քրեական դատարանի վարույթում է Ռոբերտ Հովհաննիսյանի գործով բերված վերաքննիչ բողոքի քննությունը:
Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի դատավճռով Ռոբերտ Հովհաննիսյանը մեղավոր է ճանաչվել հետևյալ արարքների համար:
Ըստ 25-ամյա Հովհաննիսյանի նախաքննական ցուցմունքի՝ 2013 թվականի ապրիլի 11-ին, ժամը 15-ի սահմաններում ինքը Կոմիտասի պողոտայի և Վ. Փափազյան փողոցի խաչմերուկում կանգնել է հետիոտնի անցուղու սկզբնամասում և սպասել, մինչև կվառվի հետիոտնի կանաչ լույսը:
Այդ նույն ժամանակ անցուղու վրա կանգնած է եղել «Օպել վեկտրա» մակնիշի մի մեքենա:
Երբ հետիոտնի կանաչ լույսը վառվել է, ինքը անցել է ճանապարհը՝ չզիջելով «Օպել»-ին:
Վերջինիս վարորդը, որ տարիքով մարդ էր, վրդովվել է, ձեռքը պատուհանից հանել ու իրեն անպատվել: Այնուհետև շրջադարձ է կատարել, կանգնել ու մեքենայի միջից հայհոյել իրեն:
Ինքը զայրացել է, մոտեցել մեքենային, ձախ ձեռքով բռնել է ավտոմեքենայի առջևի ձախ դուռը, որ վարորդը չկարողանա մեքենայից դուրս գալ, իսկ աջ բռունցքով չորս-հինգ հարված է հասցրել վարորդի դեմքի, պարանոցի, ուսի շրջանին:
Հետո վարորդը դուրս է եկել մեքենայից, հարձակվել իր վրա, բայց անցնող տղամարդիկ բաժանել են իրենց:
Վարորդը հեռախոսով խոսելով՝ նստել է մեքենա և շարունակել է իր հասցեին հայհոյել:
Ինքը, չկարողանալով զայրույթը զսպել, ոտքով մեկ անգամ հարվածել է մեքենայի առջևի դռանը, մեկ անգամ էլ՝ բեռնախցիկին:
Հետիոտնի հետ ընդհարումից հետո տուժած վարորդը վատ է զգացել: Նրան ջուր և հանգստացնող դեղ է տվել խաչմերուկում գործող կարկանդակի պատրաստման կրպակի խոհարարուհին: Կինը նկատել է, որ վարորդի շրթունքները կապտած են:
Վարորդի հեռախոսազանգով դեպքի վայր է հասել նրա որդին:
Վերջինիս ցուցմունքով՝ հայրը զանգել ու ասել է, թե խաչմերուկում մի տղա իրեն ծեծել է: Տասը րոպե անց ինքը եղել է այնտեղ:
Հորը նստեցրել է մեքենա, տարել իրենց շենքի մոտ: Հայրը շատ վատ է զգացել: Նա հենց մեքենայի մեջ էլ շնչահեղձ լինելով՝ մահացել է: 2001 թվականին հայրը սրտի վիրահատություն էր տարել:
Վկան հայտնել է նաև, որ դեպքից հետո հոր մեքենայի առջևի ձախ դուռը և բեռնախցիկը վնասված են եղել:
Դատաբժշկական փորձաքննության եզրակացությամբ՝ տուժածի դեմքին, վերին վերջույթներին, պարանոցին հայտնաբերվել են արյունազեղումներ, որոնք կենդանի անձանց մոտ թեթև վնասի հատկանիշներ չեն պարունակում:
Դատաապրանքագիտական փորձաքննության եզրակացությամբ՝ «Օպել վեկտրա» ավտոմեքենային պատճառված վնասը գնահատվել է 86 հազար դրամ:
Քաղաքապետարանից ստացված լազերային սկավառակի զննությունը ցույց է տվել, որ նշված խաչմերուկի մոտ կանգ է առնում արծաթագույն «Օպել վեկտրա» ավտոմեքենան, որին անմիջապես մոտենում է մի բարձրահասակ տղա: Նա ձեռքով մի քանի անգամ հարվածում է «Օպել»-ի վարորդին, որից հետո վարորդը մեքենայից դուրս է գալիս, նրանք սկսում են քաշքշել միմյանց: Այնուհետև վարորդը նստում է մեքենա ու հեռանում:
Ընդհանուր իրավասության դատարանում ամբաստանյալ Ռոբերտ Հովհաննիսյանն իրեն մեղավոր է ճանաչել վարորդին հարվածելու և մեքենային հարվածելով՝ վնասելու համար՝ ՀՀ քրեական օրենսգրքի 118 հոդվածով և 185 հոդվածի 1-ին մասով:
Հովհաննիսյանը հրաժարվել է ցուցմունք տալուց, պնդել է նախաքննական ցուցմունքները:
Դատարանը մեղավոր է ճանաչել Ռոբերտ Հովհաննիսյանին ու վերոհիշյալ հոդվածներով վերջին հաշվով նրան դատապարտել է 3 ամիս կալանքի: Պատժի սկիզբը կհաշվվի նրան փաստացի արգելանքի տակ վերցնելու պահից:
Դատավճռի դեմ վերաքննիչ բողոք է բերել ամբաստանյալ Հովհաննիսյանի շահերի պաշտպանը՝ խնդրելով իր պաշտպանյալի նկատմամբ նշանակել տուգանքի ձևով պատիժ կամ պատիժը պայմանականորեն չկիրառել՝ սահմանելով փորձաշրջան: