Երևանի քաղաքապետարանի կողմից իրականացվող Իսակովի պողոտան Լենինգրադյան փողոցին կապող ավտոմայրուղու հատվածներից մեկն անմիջականորեն կապված է Կ. Դեմիրճյանի անվան մարզահամերգային համալիրի սեփականությունը հանդիսացող տարածքի հետ: Այն կյանքի կոչելու դեպքում խաթարվելու է մարզահամերգային համալիրի, ինչպես նաև Ծիծեռնակաբերդ քաղաքային զբոսայգու հանրային կուտակումները սպասարկող տրանսպորտային բոլոր ենթակառուցվածքային գոտիները:
Ավելին, ինչպես տեղեկացրել ենք, գիշերային ժամերին հատվել են ծառեր, կոտրել են «Ծիծեռնակաբերդ» գրության փորագրաքարը: Այս ամենն իրականացվել է առանց համալիրի սեփականատիրոջը տեղյակ պահելու: Օրերս սեփականատիրոջ և մայրուղին կառուցող աշխատակիցների միջև տեղի ունեցած վիճաբանությունից հետո Երևանի քաղաքապետարանի ներկայացուցիչները մի քանի օրով հետաձգել են տարածքում շինաշխատանքները՝ մինչև խնդրի լուծումը:
Խնդրով մտահոգ են նաև մարզահամերգային համալիրի համահեղինակ ճարտարապետներ Գրիգոր Ազիզյանը, Հրաչյա Պողոսյանը և Գուրգեն Մուշեղյանը, ովքեր դիմել են Երևանի քաղաքապետին առաջարկով՝ հանձնարարել կարճ ժամանակով դադարեցնել տվյալ հանգույցում կատարվող շինաշխատանքները, հանձնարարել նախագծային կազմակերպությանը` նշված տրանսպորտային հանգույցի այլընտրանքային տարբերակներ մշակել և դրանք ներկայացնել քաղաքաշինական խորհրդի քննարկմանը:
Հրաչյա Պողոսյանը երեկ «Առաջին լրատվական»-ին ասաց, որ կառուցվող ճանապարհը Երևանի համար շատ կարևոր ճանապարհ է, և բնակչությունը դրանից, անշուշտ, միայն կշահի: Նա նշեց, որ վերջին օրերին մոտիկից ծանոթացել են նախագծին, տեսել, որ առկա են որոշակի սխալներ, թերություններ այն հատվածում, որը մարզահամերգային համալիրի գլխավոր մուտքի հետ է առնչվում, և այդ սխալներն այնպիսին են, որ կարող են ապագայում հանգեցնել տրանսպորտի և մարզահամերգային համալիրից դուրս եկող խոշոր մարդկային հոսանքի անախորժության: Նրա խոսքով՝ այն տեղերը, որտեղ քաղաքային տրանսպորտի կայանները պետք է լինեն մարզահամերգային համալիրի առաջ՝ Լենինգրադյան փողոցի վրա, այդ տեղերում ճանապարհն անցնում է այնպիսի մայրուղով, որ արդեն քաղաքային տրանսպորտի կայանատեղիները հնարավոր չէ անել այնքան, որքան պետք է մարզահամերգային համալիրի ժողովրդին համալիրում որևէ միջոցառման ավարտից հետո, երբ հիմնական հոսքը 5000-6000 հոգի է կազմում, պետք է արագ կազմակերպել հանրության այդտեղից հեռացումը, որովհետև մի կողմում կամուրջն է, մյուսում՝ Հալաբյանն ու Լենինգրադյանը, և շատ զգույշ պետք է լինել, որովհետև մի փոքր սխալ և կարող է բերել հետևանքների:
Ճարտարապետներն ահազանգել են քաղաքապետարան, որ հարկավոր է այդ սխալներն ուղղել, որովհետև վերջիվերջո գումարներ են ծախսվում: Հ. Պողոսյանը մեզ տեղեկացրեց, որ այսօր իրենց հրավիրել են քաղաքապետի առաջին տեղակալ Կամո Արեյանի հետ հանդիպման, որտեղ ճարտարապետներն առաջարկություններ կանեն: Նա ասաց, որ հասկանալով պահի լրջությունը՝ քաղաքապետարանը կգնա նրան, որ նախագծում փոփոխություններ արվեն, որ ճանապարհը լինի այնպիսին, ինչպիսին պետք է մեր քաղաքի համար:
Ճարտարապետ Գուրգեն Մուշեղյանն էլ նշեց, որ խոսքը վերաբերում է նրան, որ այնտեղ, որտեղ շինարարությունը դեռ չի իրականացվել, այնտեղ նախագծային փոփոխություններ իրականացնեն: «Խնդիրը չի դրվում է, թե այսօր ինչ արվել է` քանդվի, այլ այն, որ այն ինչ դադարեցվել է ժամանակավոր` մեկ օր, թե տասը օր, այդ խնդիրները վերանայեն, առաջ քաշեն նոր խնդիրներ՝ ապահովելու ազգաբնակչության ապահով տարհանումը համալիրից: Անշուշտ, այս դեպքում պետք է լինեն և ավտոհանգրվաններ, և՛ ավտոկանգառներ, որտեղ կայանեն ոչ միայն անձնական մեքենաներ, այլ հասարակական տրանսպորտի կայանման տեղեր լինեն: Սա մի կետի խնդիր չէ, համալիր գալիս են քաղաքի բոլոր շրջաններից: Սա համաքաղաքային խնդիր է»,- ասաց նա:
Հ. Պողոսյանն էլ հավելեց, որ յուրաքանչյուր նախագիծ ունենում է թերություններ, չկան իդեալական նախագծողներ, և հիմա քանի ուշ չէ, պետք է այս թերությունը վերացնել: Ճարտարապետները վստահ են, որ խնդիրը դրական լուծում է ստանալու: «Հույս ունեմ՝ Կամո Արեյանի հետ մեր հանդիպումը, նրա կենսափորձը և շինարարական փորձը կբերեն նրան, որ կհամաձայնի մեզ հետ, և նախագծի թերությունները կվերացվեն»,- ասաց նա:
