Կանադացի սենատորները երեքշաբթի պարտականությունների կատարումից հեռացրել են իրենց երեք գործընկերներին, ովքեր բռնվել էին պետությանը խաբելու մեջ: Նրանք գանձարանից փոխհատուցում էին ստացել Օտտավայում բնակարանի վարձակալության և տրանսպորտային ծախսերի համար՝ չունենալով նման իրավունք:
Պամելա Ուոլինը, Մայք Դաֆին և Պատրի Բրազոն աշխատավարձ չեն ստանա, սակայն կպահպանեն բժշկական ապահովագրությունը: Այս մասին հայտնում է ITAR-TASS-ը:
Նրանք խորհրդարան վերադառնալ կկարողանան միայն այդ պատժամիջոցների հանման կամ ընթացիկ խորհրդարանական նստաշրջանի ավարտին՝ 2015-ի հոկտեմբերից ոչ շուտ, երբ երկրում հերթական ընտրությունները կայանան:
Հեռացված սենատորները վարչապետ Սթիվեն Հարփերի կուսակցությունից են: Հենց նա էր նշանակել նրանց խորհրդարանի վերին պալատում (Կանադայում սենատորները նշանակվում են, ոչ թե ընտրվում):
Նրանք պահպանողականների խմբակցության շարքերը լքել են կուսակցության ղեկավարության պահանջով:
