ԱՄՆ ոստիկանությունը հրապարակել է ցնցող տեսանյութ, որում MS-13 կարտելի անդամ հանդիսացող գանգստեր աղջիկը սառնասրտորեն խոստովանում է 15-ամյա դեռահաս աղջկա սպանությունը։ Կադրերում 18-ամյա Վինուս Ռոմերո Իրահետան նստած է բազմոցին՝ ձեռքերը գրպանում, և հանգիստ պատմում է հանցագործության մասին։ Այս մասին հայտնում է Mirror-ը։
Մեղադրյալի կարծիքով՝ զոհը մասնակից է եղել իր բոյֆրենդի մահվանը, ով հանդիսացել MS-13 հանցավոր խմբավորման անդամ։ Այդ իսկ պատճառով Վինուսն առևանգել է Դամարիս Ռեյես Ռիվասին և տարել նրան Ֆերֆաքս շրջանի անտառ (Վիրջինիա)։ Մի քանի ժամ շարունակ աղջկան կտտանքների են ենթարկել, որից հետո դանակահարել։ Վերջին բանը, որ Վինուսն ասել է զոհին, հետևյալն է եղել. «Դու ինձ կհիշես մինչև այն պահը, երբ մենք կհանդիպենք դժոխքում։ Անունս չմոռանաս»։
«Չեմ հիշում, թե քանի անգամ եմ դանակով հարվածել նրա որովայնի։ Հավանաբար՝ 13»,-ասել է Վինուս Ռոմերո Իրահետան։
Դանակի բազմաթիվ հարվածներ են հասցրել նաև խմբավորման մյուս անդամները։ Դրանից հետո Դամարիսի դին կապել են պարանով և թողել կամրջի տակ։ Հանցագործները տեսանկարահանել են սպանությունն ու տեսանյութն ուղարկել իրենց պարագլուխներին։
MS-13-ը ստեղծվել է 1980-ականներին, Լոս Անջելեսում, փողոցային հանցագործների կողմից։
