Կովկասի մահմեդականների վարչության ղեկավար Ալլաշուքյուր Փաշազադեն նոյեմբերի 1-ին հանդիպել է օգոստոսին Ադրբեջան գերի ընկած Հակոբ Ինջիղուլյանի հետ, հայտնում է ադրբեջանական APA գործակալությունը:
Ինչպես գործակալությանը հայտնել են Կովկասի մահմեդականների վարչությունից, նա հանդիպել է հայ զինծառայողի հետ Ամենայն հայոց կաթողիկոս Գարեգին Երկրորդի խնդրանքով:
Հանդիպմանը ներկա են եղել նաև Ռուս ուղղափառ եկեղեցու Բաքվի արքեպիսկոպոս Ալեքսանդր Իշեինը, Ադրբեջանում հրեաների համայնքի ղեկավար Մելիք Եվդաևը ու Բաքվում Կաթոլիկ համայնքի ղեկավար Վլադիմիր Ֆետեկեն:
Հիշեցնենք, որ օգոստոսի 7-ի լույս 8-ի գիշերը ԼՂՀ ՊԲ շարքային զինծառայող, 1991թ. ծնված Հակոբ Ինջիղուլյանը տեղանքում չկողմնորոշվելու հետևանքով հատել է ղարաբաղա-ադրբեջանական սահմանը` հայտնվելով Ադրբեջանի կողմից վերահսկվող տարածքում: Հակոբին մեկ օր անց տեղափոխել են Բաքու: