ՀՀ օդանավակայաններում թռիչք-վայրէջքները 18 տոկոսով աճ են գրանցել։ Այս մասին տարեկան ամփոփիչ ասուլիսի ժամանակ ասաց ՀՀ կառավարությանն առընթեր քաղաքացիական ավիացիայի գլխավոր վարչության պետ Սերգեյ Ավետիսյանը։
«ՀՀ օդանավակայաններում թռիչք-վայրէջքները աճել են 18 տոկոսով։ ՀՀ օդային մայրուղիներում սպասարկված չվերթների քանակը նույնպես կտրուկ աճել է»,- նշեց Ավետիսյանը։
2017 թվականի դեկտեմբերի 25-ի դրությամբ ՀՀ օդային մայրուղիներում իրականացվել է 53 հազար 270 չվերթ։ Նախորդ տարվա նույն ժամանակահատվածի ցուցանիշը գերազանցվել է 39,9 տոկոսով։ 2016 թվականի վերը նշված ժամանակահատվածում ՀՀ օդային մայրուղիներում սպասարկվել էր 38 հազար 83 չվերթ։
«2017 թվականի դեկտեմբեր ամսից սկսած Հայաստանում գործում է օդային մայրուղիներից ազատ օդային տարածքի հայեցակարգը։ Տարանցիկ չվերթներ իրականացնող ավիաընկերություններին այն հնարավորություն է տալիս ՀՀ օդային տարածք մուտք գործել ցանկացած կետից, այնուհետև ազատ տեղաշարժվելով հանրապետության օդային տարածքում, դուրս գալ նույնպես ցանկացած կետից։ Սա ավիաընկերությունների համար շատ մեծ խնայողություն է թե՛ վառելիքի և, թե՛ ժամանակի առումով։ Այս քայլն արվել է, որպեսզի Հայաստանի օդային տարածքն ավելի գրավիչ դառնա ավիաընկերությունների համար՝ մեր պետության վրայով թռիչքներ իրականացնելու համար»,- ընդգծեց ՀՀ ԿԱ քաղաքացիական ավիացիայի գլխավոր վարչության պետը։
Դեկտեմբեր ամսվա դրությամբ 28 ավիաընկերություն իրականացնում է կանոնավոր օդային փոխադրումներ Հայաստան Հանրապետությունից՝ օրական կատարելով 30-35 չվերթ։