Թաիլանդի Չոնբուրի նահանգի պարկում չինացի զբոսաշրջիկների պատճառով կատաղած փիղը սպանել է զբոսավարին: Daily Mail-ի հաղորդմամբ՝ զբոսաշրջիկները փորձել են լուսանկարվել 17-ամյա Պայ փղի հետ, նրանցից մեկը քաշել է կենդանու պոչից:
Ֆոտոնկարահանման ընթացքում փղի մեջքին երկու աղջիկ է նստած եղել: Երբ ինչ-որ մեկը քաշել է Պայի պոչից, նա իր մեջքին նստածներին ցած է նետել և սկսել է գրոհել զբոսաշրջիկներին: Զբոսավար Յունցզե Հին փորձել է կանգնեցնել կենդանուն, այդ ժամանակ փիղը նրան գետնին է գցել և ոտնահարել: Դրանից հետո պարկի աշխատակիցներին հաջողվել է Պային բռնել և կապել ծառին:
Մաուգ Աու Յունգունը, ով Պայի հետ աշխատել է ավելի քան 15 տարի, ոստիկանությանը պատմել է, որ փիղը նախկինում ագրեսիայի ոչ մի նշան չի ցուցաբերել: Հավանաբար զբոսաշրջիկների ոչ ադեկվատ պահվածքը պարզապես վախեցրել է կենդանուն: Ներկայումս ոստիկանությունը պարզում է տեղի ունեցածի մանրամասները: Փղի պոչը քաշած զբոսաշրջիկը կպատժվի, թե ոչ՝ հայտնի չէ:
