Մենք որոշակիորեն պատրաստ ենք նվազեցնել լարվածությունը Ռուսաստանի հետ հարաբերություններում: Այս մասին BBC-ի ռուսական ծառայությանը տված հարցազրույցի ժամանակ հայտարարել է Վրաստանի նորընտիր նախագահ Գեորգի Մարգվելաշվիլին:
Մարգվելաշվիլին, խոսելով Վրաստանի արտաքին քաղաքականության մասին, անդրադարձել է նաև Եվրամիության հետ հարաբերություններին և նշել, որ մի քանի օր հետո Վիլնյուսում կայանալու է գագաթնաժողով, որտեղ իրենք մտադիր են վավերացնել հարաբերությունները, ասոցացումը և առևտրային հարաբերությունները ԵՄ-ի հետ:
«Դա կարևոր քայլ է՝ ուղղված Վրաստանի զարգացմանը՝ որպես եվրոպական երկիր: Միևնույն ժամանակ մենք ունենք ագրեսիայի և լարվածության նվազման որոշակի ձևաչափ ՌԴ-ի հետ հարաբերություններում»,- ասել է նա:
Մարգվելաշվիլին հավաստիացրել է, որ պաշտոնական Թբիլիսին մտադիր է զարգացնել առևտրային հարաբերությունները, մշակութային կապերը Ռուսաստանի հետ:
«Որոշակի պահին մենք պատրաստ կլինենք ավելի արդյունավետ աշխատել ժնևյան ձևաչափով, որտեղ վրացի և ռուս դիվանագետները հանդիպում են մեր արևմտյան գործընկերների հետ և խոսում այն խնդիրների մասին, որոնք ստեղծվել են 2008թ., այն իրականության մասին, որը պետք է փոխել: Մենք կարծում ենք, որ իրադրության կայունացումը կհանգեցնի ռացիոնալ երկխոսության մեր երկրների միջև»,- ընդգծել է Մարգվելաշվիլին:
