«Եթե նման նպատակն իրագործելու լուրջ ցանկություն ունի կառավարությունը, ապա պետք է լուրջ մարդիկ ունենա՝ հատկապես ռազմավարական նախաձեռնությունների կենտրոնում, տարբեր նախարարություններում, որոնք կհասկանան, թե այդ նպատակին հասնելու համար ինչ է պետք անել, բայց եթե նրանք չկան, ապա դրա փոխարեն կան բավականին բանիմաց փորձագետներ, կենսափորձ ունեցող մարդիկ, որոնք կարող են այդպիսի ծրագրեր ոչ միայն մշակել, այլ նաև իրագործել, ուրեմն իրենց տեղը պետք է զիջեն արժանիներին»,- «Առաջին լրատվական»-ի հետ զրույցում նման կարծիք հայտնեց «Այլընտրանք» հետազոտական կենտրոնի ղեկավար Թաթուլ Մանասերյանը՝ անդրադառնալով Սերժ Սարգսյանի այն հայտարարությանը, որ 2040թ.-ին Հայաստանի բնակչությունը պետք է հասնի 4 միլիոնի։
«Գաղտնիք չէ, որ ձեր հաջողությունները նշանակում են տնտեսական աճ, նշանակում են նոր աշխատատեղեր, նշանակում են բարեկեցություն։
Ես վստահ եմ, որ մենք 2018 թվականին ունենալու ենք շատ ավելի լավ արդյունքներ, քան 2017-ին, որովհետև 2017-ին արդեն բավականաչափ նախադրյալներ են ստեղծվել, որպեսզի տարին փակենք բավարար տնտեսական աճով: Կանխատեսումներ չանեմ, բայց կարծում եմ՝ տնտեսական աճ 6 տոկոսից ավելին ենք ունենալու», – դեկտեմբերի 21-ին հայտարարեց Սերժ Սարգսյանը՝ ելույթ ունենալով Հայաստանի գործարար համայնքի ներկայացուցիչների համար Ամանորի և Սուրբ Ծննդյան տոների առթիվ նախագահականում կազմակերպված ընդունելությանը:
Խոսելով նաև Սերժ Սարգսյանի այս հայտարարության մասին և պատասխանելով հարցին, թե որքանո՞վ է սա իրատեսական, ի՞նչ նախադրյալներ կան նման ցուցանիշ ապահովելու համար, Թաթուլ Մանասերյանը, նշեց. «Իրականում ոչ թե 6 տոկոս, այլ 16 կամ 26 տոկոս կարող ենք ապահովել, եթե ճիշտ օգտագործենք մարդկային ռեսուրսները և ընդհանրապես բոլոր այն ռեսուրսները, որն ունի ՀՀ-ն, բայց այդ ռեսուրսները շատ վատ են օգտագործվում, և նման պայմաններում, իհարկե, պիտի շատ դժվար լինի նման ցուցանիշ ապահովել, այսինքն՝ կան բոլոր հնարավորությունները, թերօգտագործված են ռեսուրսները, և կարծում եմ, որ մեծ մասամբ ճիշտ մարդիկ չեն իրենց տեղերում:
Կարծում եմ, որ կառավարությունն այն խոստումները, որոնք տալիս է, պետք է նախ հիմնավորի, և երկրորդ՝ եթե դրանք չեն կատարվում, ապա դրանց համար պատասխան տա»։
Մանրամասները՝ տեսանյութում։
