Երեկ ՄԱԿ-ի Գլխավոր ասամբլեան ընդունել է բանաձև՝ ԱՄՆ-ին կոչ անելով հետ կանգնել Երուսաղեմը Իսրայելի մայրաքաղաք ճանաչելու որոշումից: Բանաձևին կողմ է քվեարկել 128 երկիր, այդ թվում՝ Հայաստանը:
«Հայաստանը փաստորեն կիսում է միջազգային հանրության տրամադրությունը, որովհետև խնդիրը պետք է լուծվի խաղաղ և ինքնորոշման իրավունքի հիման վրա, ինչը մեզ համար սկզբունքային հարց է»,- «Առաջին լրատվական»-ի հետ զրույցում ասաց արաբագետ Հայկ Քոչարյանը՝ անդրադառնալով Հայաստանի քվեարկության տարբերակին:
Արաբագետը կարծում է, սակայն, որ կարելի էր օգտագործել ՄԱԿ-ի ամբիոնը՝ բարձրաձայնելով հայկական ներկայության մասին. «Սա հնարավորություն էր, որ բաց ենք թողել»:
Ինչ վերաբերում է հայկական կալվածքներին, մեր զրուցակիցը կարծում է, որ դրանք Թրամփի որոշմամբ չէ, որ վտանգի տակ են հայտնվել, պարզապես սրվել է այդ վտանգը. «Դեռ պետք է շնորհակալություն հայտնենք Թրամփին, որ էլի սկսել ենք խոսել Երուսաղեմի մասին»:
Հարցին՝ Հայաստանի քվեարկությունը որքանո՞վ կվնասի հայ-ամերիկյան հարաբերություններին, Հայկ Քոչարյանը պատասխանեց. «Մեր շահերից էդ պահին չէր բխում ընդունել դա, պարզապես պետք է առաջ տանենք մեր շահը, որպեսզի բոլորին հասկանալի լինի՝ ինչի ենք մենք այդպես որոշել: Իսկ Թրամփի շանտաժը, թե՝ գումար ենք տալիս, պահանջում ենք, բիզնես մոտեցում է: Պետությունների հարաբերությունները միայն գումարով չեն որոշվում: ԱՄՆ-ում կա լուրջ հայկական ներկայություն, որը կարող ենք հօգուտ մեր շահերի օգտագործել, ինչն անում ենք կիսով չափ»:
Մանրամասները՝ տեսանյութում:
