Մեր տեղեկություններով՝ ՊՆ-ին կարագի փոխարեն մարգարին վաճառելու փաստով Ազգային անվտանգության ծառայությունում հարուցված քրեական գործի նախաքննությունն ավարտվել է, և գործը շուտով կգնա դատարան։
ԱԱԾ-ից և Սննդամթերքի անվտանգության ծառայությունից այս գործի հետ կապված որևէ տեղեկություն ճշտել չհաջողվեց։ Երկու կառույցում էլ լռություն է։ ՍԱՊԾ-ից հրաժարվեցին պատասխանել նաև մեր այն հարցերին, թե ովքեր են քրեական գործով անցնող ՍԱՊԾ աշխատակիցները, ինչ պաշտոն են նրանք զբաղեցնում, և արդյոք ՍԱՊԾ պետը տեղյա՞կ է եղել, որ իր աշխատողները պաշտոնական կեղծիք են կատարել՝ փորձաքննության ենթարկված ապրանքի վերաբերյալ կեղծ տեղեկանք տրամադրելով։ «Բոլոր հարցերն ուղղեք իրավապահներին»,- մեզ հետ զրույցում ասաց ՍԱՊԾ մամուլի խոսնակ Նվարդ Առաքելյանը։
Հիշեցնենք, որ այս տարվա սկզբին հայաստանյան երկու կազմակերպություն արտերկրից մարգարին է ներկրել ու կարագի անվան տակ 14 տոննա վաճառել պաշտպանության նախարարությանը: Ազգային անվտանգության ծառայությունը, սակայն, դուրս է եկել հետքի վրա։ ԱԱԾ-ն ուսումնասիրություններ է անցկացրել և պարզել, որ այդ կազմակերպությունը ՊՆ-ին խաբելու միջոցով միլիոնավոր դոլարներ է գրպանել: Գործը սկսել է քննվել դեռևս ամռանը։ Գործով անցնում են ՍԱՊԾ մի շարք աշխատակիցներ՝ ՀԱԲԼԾԿ ՊՈԱԿ Սննդամթերքի անվտանգության լաբորատորիայի ղեկավար Ցողիկ Գզիրյանը, նույն լաբորատորիայի Սննդամթերքում մնացորդային նյութերի հայտնաբերման բաժնի պետ Հեղինե Ղարիբյանը, նույն լաբորատորիայի ֆիզիկաքիմիական հետազոտությունների բաժնի աշխատակից Գառնիկ Մարգարյանը և ես մեկ աշխատակցուհի նույն բաժնից։
Լուսանկարում՝ Սննդամթերքում մնացորդային նյութերի հայտնաբերման բաժնի պետ Հեղինե Ղարիբյանը
Ցողիկ Գզիրյանի լիազորությունները կասեցված են։ Գործով ձերբակալվածներ, կալանավորվածներ չկան։ ԱԱԾ լրատվականից, սակայն, առհասարակ մեր հեռախոսազանգերին չպատասխանեցին։ Պաշտոնապես հայտնի չէ նաև, թե ինչ հոդվածով է քրեական գործը հարուցված։ Մեզ, սակայն, հաջողվեց պարզել, որ գործը հարուցված է հանցավոր անփութություն հոդվածով, որը, սակայն, զավեշտալի է, քանի որ մենք արդեն գրել էինք, որ այս կեղծիքում մեծ դերակատարություն է ունեցել ՍԱՊԾ պետի տեղակալ Եղիշե Մարգարյանը, ում մերձավոր շրջապատին էլ հենց պատկանում են ՊՆ-ի տենդերը շահած ընկերությունները՝ ՍՊ ՍՊԸ-ն և «Էլայզեռ» ՍՊԸ-ն։ Թեև ՍԱՊԾ-ն պաշտոնապես հերքել է Եղիշե Մարգարյանի մասնակցությունը այս գործին։
Լուսանկարում ձախից առաջինը՝ ՀԱԲԼԾԿ ՊՈԱԿ Սննդամթերքի անվտանգության լաբորատորիայի ղեկավար Ցողիկ Գզիրյանը
Ուշագրավ է, սակայն, որ, ասենք, ՀԱԲԼԾԿ ՊՈԱԿ-ի տնօրեն Կարեն Միրզոյանը նույնպես որևէ կերպ չի անցնում գործով, մինչդեռ աշխատակիցների իրականացրած փորձաքննության եզրակացությունը կնքում և ստորագրում է հենց տնօրենը, որը տվյալ դեպքում ստացվում է, որ հաստատել է իրականացված կեղծիքը, սակայն որևէ կերպ պատասխանատվության չի ենթարկվելու։
Լուսանկարում՝ ՍԱՊԾ պետի տեղակալ Եղիշե Մարգարյանը
Նշենք, սակայն, որ եթե հարուցված քրեական գործով արդարացի քննություն իրականացվի, ապա 4-8 տարի ազատազրկում է սպառնում ՍԱՊԾ աշխատակիցներին, ովքեր, մեր տեղեկություններով, մեղքը իրենց վրա են վերցրել, ասել են, որ իրենք են սխալ փորձաքննություն արել և մարգարինը կարագի տեղ ներկայացրել, և որ որևէ մեկի կողմից նման հանձնարարություն չեն ստացել։
Լուսանկարը՝ panorama.am-ի