РИА Новости-ի փոխանցմամբ՝ Թուրքիայի Բոդրում հանգստավայրում անորակ ալկոհոլից մահացած ռուս զբոսաշրջիկների գործը քննող Թուրքիայի դատախազությունը հանգել է այն եզրակացության, որ նրանք սպանվել են միտումնավոր եղանակով։ Այս մասին հայտարարել է Թուրքիայի մշակույթի ու զբոսաշրջության նախարարությունը։
Վերջինիս խորհրդական Ջելալ Քըլըչը հայտարարել է. «Այս դեպքում խոսքը չի գնում փչացած սննդից թունավորման մասին, ոչ էլ տարրական անփութության ու անպատասխանատվության մասին։ Այն անձը, ով սպիրտային մեթանոլ է ավելացրել վիսկու մեջ, գիտակցել է, որ թույն է ավելացնում և որ դրանից մարդիկ կարող են մահանալ»։
Հիշեցնենք, որ ռուս զբոսաշրջիկները թունավորվել են կիպրացի թուրքերի ներկրած Mister Burdon վիսկիից, որում մեթիլ սպիրտի առկայությունը երեք անգամ գերազանցել էր թույլատրելի նորման։
Այս գործի շրջանակներում թուրքական ոստիկանությունն առգրավել է կեղծված ալկոհոլի 7000 շիշ և ձերբակալել 22 մարդու։ Ձերբակալությունները տեղի են ունեցել թուրքական միանգամից 4 նահանգում, այդ թվում՝ Անթալիայում ու Ստամբուլում։