«Անելիքները շատ են՝ առաջին հերթին քաղբանտարկյալների հարցն է, որի առիթով դեկտեմբերի 10-ին երթ անցկացրեցինք և երկու նամակ գրեցինք, դեռ մեկ նամակ էլ պետք է գրենք։ Իրավիճակն արդեն անցնում է թույլատրելիության բոլոր սահմանները»,- «Առաջին լրատվական»-ի հետ զրույցում ասաց «Հանուն Հայաստան պետության ճակատի» նախաձեռնող խմբի անդամ Թամար Հովհաննիսյանը։
Նրա խոսքերով՝ հունվարի մեկին Գևորգ Սաֆարյանին ազատ չարձակելու հանգամանքը վկայում է այն մասին, որ նրան ուզում են իզոլացնել հասարակությունից. «Այս վիճակում էլ շարունակում են այդ երիտասարդի նկատմամբ կտտանքները։ Հայտնի են երկու-երեք սոսկալի դեպքեր, երբ խցակիցները նրան ծեծել էին՝ մեկը բոլորովին վերջերս։ Այդքան համակրելի, կիրթ ու ազնիվ երիտասարդ, և այսպիսի իրավիճակում նրա հայտնվելն անթույլատրելի է։ Ճակատի բոլոր անդամները համաձայն են, ու մենք անելիքներ ենք մշակում այդ ուղղությամբ։ Ոչ միայն նա՝ նույնը Կարո Եղնուկյան, Ժիրայր Սեֆիլյան, արդեն կայացած վճիռ կա Արմեն Միքայելյանի մասով»։
Հարցին, թե ի՞նչ ակնկալիքներ կան միջազգային կառույցներից, երբ նրանք իրենց զեկույցներում ու հայտարարություննեում չեն նշում, որ Հայաստանում կան քաղբանտարկյալներ, մեր զրուցակիցն արձագանքեց. «Միջազգային կառույցները, գուցեև Եվրամիության դեսպանը՝ Սվիտալսկին, այդ ձևակերպումը չտվեցին, այլ կառույցների հայաստանյան գրասենյակները ևս։ Բայց դա դեռ չի նշանակում, որ միջազգային կառույցների ընդունած կոնվենցիաներին նրանք չեն համապատասխանում։ Այս գրասենյակների, ԵՄ դեսպանի հետ պետք է շարունակենք բանակցել։ Հենվելով ԵԽԽՎ սահմանումից՝ այնտեղ հինգ կետ կա, որոնցից առնվազն չորսին նշածս մարդիկ համապատասխանում են, մինչդեռ ընդամենը մեկն էլ բավարար է, որպեսզի նրանք կոչվեն քաղբանտարկյալ»։
Արդյոք «Սասնա ծռեր»-ը ևս քաղբանտարկյալ են, դիտարկմանն ի պատասխան, մեր զրուցակիցն ասաց. «Սասնա ծռեր»-ը կատարել են մի գործողություն, որի դրդապատճառը եղել է քաղաքական։ Եթե ներկա լինեք դատավարություններին, լսեք նրանց, նրանց փաստաբանների խոսքը՝ դուք կտեսնեք, որ օբյեկտիվորեն նրանք կարող են քաղբանտարկյալ համարվեն։ Բայց եթե նույնիսկ զենքի առկայությունը թույլ չի տալիս այդ ձևակերպումը նրանց վերագրել, ապա նրանք կարող են համարվել թե՛ ապստամբ, թե՛ ռազմագերի»։
Հարցազրույցն ամբողջությամբ՝ տեսանյութում։
