Երեկ ամերիկյան CNBC հայտնի բիզնես հեռուստալիքներից մեկի կայքն անդրադարձել է Վիեննայում ընթացող Համաշխարհային տնտեսական ֆորումի ժամանակ ՀՀ վարչապետ Տիգրան Սարգսյանի պատասխանին: Կայքում տեղադրված տեքստը որոշ կրճատումներով ներկայացնում ենք ձեր ուշադրությանը:
«Երևանի ռադիոն թերևս միակ կոմունիստական ռադիոն էր Արևելյան Եվրոպայի տարածքում, որ ասում էր ճշմարտությունը: Այն կատակների շատ հայտնի աղբյուր էր, որոնք շրջանառվում էին տարածաշրջանում մինչև 1989 թ. սկսված հեղափոխությունները:
Ռադիոն հիմնականում պատասխանում էր ունկնդիրների հարցերին: Հայտնի կատակը հնչում էր հետևյալ կերպ. «Հնարավո՞ր է, արդյոք, կոմունիզմ հաստատել Շվեյցարիայում»: «Այո, հնարավոր է, սակայն դա շատ ցավալի կլինի»,- պատասխանում էր հայկական ռադիոն:»
Կայքը հայկական ռադիոյի մասին հիշել էր այն բանից հետո, երբ Համաշխարհային տնտեսական ֆորումի ժամանակ, որին մասնակցում է նաև ՀՀ վարչապետ Տիգրան Սարգսյանը, Ռուսաստանի, Ղազախստանի և Հայաստանի ներկայացուցիչներին հարց է ուղղվել, թե «արդյո՞ք բարձր գները օրհնություն կամ անեծք են ձեր երկրների համար»: «Երբեմն ես շնորհակալություն եմ հայտնում Աստծուց, որ մենք նավթ չունենք»,- ժպտալով պատասխանել է Տ. Սարգսյանը, ապա շարունակել. «Մենք ստիպված ենք գործի դնել մեր ուղեղները»: