Ադրբեջանական ANS PRESS-ի փոխանցմամբ՝ Թուրքիայի արտգործնախարար Ահմեդ Դավութօղլուն կարևորել է Ադրբեջանի մասնակցությունը Nabucco նախագծին.
«Այդ գազատարն առավել կմեծացնի Ադրբեջանի հետագա հնարավորությունները։ Ադրբեջանական և կասպյան այլ երկրների գազի փոխադրումը եվրոպական երկրներ Ադրբեջանին կտա մեծ ուժ։ Այդ պլանում «մեկ ազգ, երկու պետություն» սկզբունքին հավատարիմ Թուրքիան մշտապես պատրաստ է օգնել Ադրբեջանին և թյուրքական մյուս երկրներին։ Nabucco-ն կարևոր նախագիծ է, այն Եվրոպայի համար կապահովի գազի մատակարարումների դիվերսիֆիկացում։
Ապագայում Իրաքը նույնպես մտադիր է միանալ այս նախագծին։ Այնպիսի երկրների համար, ինչպիսին Իրաքն է, Nabucco-ի նախագծին միանալու դեպքում ելքեր կապահովվեն դեպի արտաքին շուկաներ։ Այդ պլանում այս նախագիծը շատ կարևոր է։ Այն մեծ օգուտներ կբերի թե՛ Ադրբեջանի, թե՛ Թուրքիայի տնտեսություններին»։
Հիշեցնենք, որ ցայժմ Nabucco նախագծի իրագործման ձգձգումն առաջին հերթին պայմանավորված է եղել ոչ թե նրա ֆինանսական բարձր արժեքով (սկզբնական շրջանում նախագիծը գնահատվում էր 8 միլիարդ դոլար, ապա դա աճեց մինչև 12-15 միլիարդ դոլարի), այլ ապագա գազատարի լիաբեռնման գործոնով, առանց որի ապահովման անիմաստ է դառնում նախագծի իրագործումը։
Nabucco-ի իրագործման դեպքում Թուրքիայի ձեռքում կհայտնվի ևս մեկ հզոր լծակ, ինչը Թուրքիան հետագայում կարող է գործածել թե՛ իր տարածքով Եվրոպա փոխադրվող գազի վերավաճառման համար, թե՛ ԵՄ-ին իր անդամակցությունն արագացնելու ու ապահովելու գործում պաշտոնական Բրյուսելին էներգետիկ շանտաժի ենթարկելու համար։