Լիբիայի արևելքում ինքնահռչակ Կիրենաիկա ինքնավարությունը հայտարարել է սեփական կառավարություն ստեղծելու մասին՝ հաղորդում է ITAR-TASS-ը:
Կաբինետը, որի կազմում 24 նախարար է, ներկայացվել է Իջաբիայում՝ երբեմնի անկախ Կիրենաիկա պետության հին մայրաքաղաքում: Հայտարարվել է, որ ինքնավար կառավարությունը կներկայացնի բոլոր քաղաքների և սոցիալական խմբերի շահերը, որոնք բնակվում են Կիենաիկայի տարածքում: Ինքնավարության մեջ մտնում են Բենղազին, Ջեբալ Ախդարը, Թոբրուքը և Իջաբիան:
Հիշեցնենք, որ Մուամադ Քադաֆիի վարչակարգի դեմ խռովությունը սկսվել է հենց Կիրենաիկայում՝ Բենղազիում Լիբիայի ազգային անցումային խորհրդի ստեղծմամբ: Լիբիայի պաշտոնական ներկայացուցիչները Կիրենաիկայի ինքնավար կարգավիճակն անօրինական են համարում: