Ադրբեջանական APA լրատվական գործակալության փոխանցմամբ, Ադրբեջանի փոխարտգործնախարար Արազ Ազիմովն անդրադարձել է մայիսի 26-ին ԵԱՀԿ Մինսկի խմբի համանախագահող երկրների նախագահների դովիլյան հայտարարությանը.
«Մենք համակ ուշադրությամբ կարդացինք այդ հայտարությունը։ Ադրբեջանը հարգում է Հելսինկյան ամփոփիչ ակտի բոլոր սկզբունքները և գիտակցում է, որ ազգերի ինքնորոշման իրավունքը պետք է իրականացվի պետության տարածքային ամբողջականությանը համապատասխան։ Ադրբեջանը պատրաստ է համընդհանուր ընդունված միջազգային իրավունքի սկզբունքների շրջանակներում գնալ փոխզիջումների ու ճկունության։
Ինքնորոշման կարգավիճակը պետք է քննարկվի հաջորդ փուլում՝ երկու համայնքների (հայկական ու ադրբեջանական) մասնակցությամբ։ Մենք հուսով ենք այդ ճանապարհով հասնել հայկական կողմի համաձայնությանը։
Մենք համաձայն ենք համանախագահների հետ, որ ներկայիս ստատուս-քվոն անընդունելի է։ Բանակցությունների ժամանակ Ադրբեջանը «չի քննարկում» իր տարածքային ամբողջականության հարցը։ Լեռնային Ղարաբաղի երկու համայքների ինքնորոշման կարգավիճակը «պետք է» լուծվի Ադրբեջանի տարածքային ամբողջականության շրջանակներում»։