Թերթը գրում է. «Վարչապետը, հանրակրթական դպրոցի տնօրենի նման, հենց խոսվում է դպրոցի բարեփոխման մասին, սկսում է այն բարեկարգել, նոր նստարաններ, եվրոպատուհաններ, հիմա էլ աշակերտներին տեսահսկելու համար սարքեր տեղադրելով: Արքեպիսկոպոսին ատրճանակ նվիրող վարչապետը, որ մի վայրկյանում քաղաքի կենտրոնի տները գերակա շահ ճանաչելով՝ էլիտար նորակառույցի համար ճանապարհ է հարթում, որոշակի պարբերականությամբ ու աներևակայելի խորաթափանցությամբ մտածում-մտածում է ու գտնում երկրի անփառունակ վիճակի գաղտնիքը։ Այս անգամ մի քանի կոպեկ վաստակող պոլիկլինիկայի բժիշկներն են»։
«Բժիշկներն էլ այս առիթով իրենց կարծիքն ունեն. «Մարմնամարզության գնացող երեխային արդյոք անհրաժե՞շտ չէ ողնաշարի հետազոտություն: Իսկ եթե այս ամենն արվում է անվճար, ինչու է պոլիկլինիկայի բժիշկն աշխատանքի գալիս ընդհանրապես՝ ամիսը 45 հազար դրամի համա՞ր: Ե՞րբ մարդու նման կապրի պոլիկլինիկայի բժիշկը, որը ցրտին ու շոգին վազվզում է տեղամասով ու սարսափելի պատասխանատվություն կրում ամեն նորածնի ու ամեն արված պատվաստման համար՝ սրա մասին պետական հավես չկա մտածելու, ինքներդ մի բան մտածեք, օրինակ, վեր կացեք, գնացեք ուրիշ երկիր՝ մոբիլ դար է»,- գրում է «Երկիր»-ը և հավելում. «Ու վարչապետն այնպիսի իրական զայրույթ է իջեցնում դեմքին, որ եթե մի փոքր բացակայած լինես երկրից, կմտածես՝ մետամորֆոզներ են տեղի ունեցել, ու դու բաց ես թողել: Մարդու անկեղծ զայրույթը բարդ դիմախաղ է պահանջում, իսկ վարչապետն, իրոք զայրացած էր»:
«Պոլիկլինիկաներն այսօրվանից ՀՀ ամենակոռումպացված միավորն ե՞ն։ Ի՞րոք նրանցից է պետք սկսել երկիրը կարգի բերելու գործը»,- հարցնում է «Երկիր»-ը։
