Հայաստանում նորարարական տեխնոլոգիաներով բազմաֆունկցիոնալ բեռնատար ավտոմեքենաների արտադրություն սկսել պատրաստվող «ԱԱ Թրաքս» ընկերությունն այս պահին նախապատրաստական աշխատանքներ է իրականացնում` նախաարտադրական պրոցեսը սկսելու համար: «Արմենպրես»-ի հետ զրույցում այս մասին ասաց «ԱԱ Թրաքս» ընկերության տնօրեն Արմեն Գագիկյանը:
«Մենք այս պահին նախապատրաստական աշխատանքների փուլում ենք: Արտադրությունը սկսելու, մեքենաների հավաքման համար անհրաժեշտ դետալները և սարքավորումներն ենք ներկրում Հայաստան: Նախապատրաստական աշխատանքների ավարտից հետո արդեն կսկսենք նախաարտադրական պրոցեսը»,- ընդգծեց Գագիկյանը:
Նա դժվարացավ պատասխանել հարցին, թե երբ հնարավոր կլինի սկսել բեռնատարների արտադրությունը` ընդգծելով, որ սովորաբար նախապատրաստական աշխատանքները երկարատև գործընթաց են: «Այս պահին հստակ ժամկետներ չեմ կարող նշել, քանի որ երկարատև գործընթացի մեջ ենք»,- ասաց ընկերության տնօրենը:
Արմեն Գագիկյանը մանրամասնեց, որ իրենք արտադրելու են մի քանի տեսակի բազմաֆունկցիոնալ բեռնատարներ: «Արտադրելու ենք բեռնատարներ, որոնք ունենալու են, օրինակ, սառնարան, խոհանոց, կարող է լինել նաև հիվանդանոցային որոշ ծառայություններ մատուցող ռեանոմոբիլներ, նաև ոստիկանական բեռնատարներ, տեղեկատվական տեխնոլոգիաներով հագեցած բեռնատարներ»,- մանրամասնեց նա:
Արմեն Գագիկանը նաև մանրամասնեց, որ իրենք ՀՀ տնտեսական զարգացման և ներդրումների նախարարությանը ներկայացրել են իրենց 5-ամյա գործունեության ծրագիրը և նկատեց` եթե ամեն ինչ ընթանա իրենց ծրագրով, գործունեության առաջին 5 տարիների ընթացքում կունենան 1000-ից ավելի աշխատատեղ:
Կառավարության որոշմամբ «ԱԱ Թրաքս» ՍՊԸ-ին տրամադրվել է «Ալյանս» ազատ տնտեսական գոտու շահագործողի թույլտվություն: «ԱԱ Թրաքս» ընկերությունը ծրագիրը կյանքի կոչելու համար 40 միլիոն դոլարի ներդրում կիրականացնի: Նախատեսված է, որ արտահանման ծավալները ծրագրի 5-րդ տարում կկազմեն 25 մլն դոլար: Արտահանման ուղղություններն են՝ ԵԱՏՄ երկրներ, Իրան, Վրաստան, ԱՄՆ, Մերձավոր Արևելքի և Միջին Ասիայի երկրներ: Առաջին երկու տարում կստեղծվի 40 նոր աշխատատեղ՝ 150 000 դրամ միջին աշխատավարձով, իսկ հետագայում արտադրանքի ծավալների աճի արդյունքում՝ 1000-ից ավելի նոր աշխատատեղ:
