«Ես տպավորություն ունեմ, որ երկրովի ընկել ենք ալոգիզմի անդունդը, և այդտեղից ելքը որն է, ինչպես պետք է դուրս գանք, ես չեմ հասկանում»- «Առաջին լրատվական»-ի հետ զրույցում ասաց դերասանուհի, ռեժիսոր, Ազգային դիմադրության ճակատի համակարգող Թամար Հովհաննիսյանը՝ անդրադառնալով «Սասնա ծռեր»-ի դատավարությանը:
Թամար Հովհաննիսյանը նշեց, որ չի հասկանում, թե ինչ տրամաբանությամբ է «Սասնա ծռեր»-ի հետ միաժամանակ դատվում Կարո Եղնուկյանը. «Ինքը բոլորովին այլ գործողությունների մեջ է «մեղադրվում», նրանք՝ բոլորովին այլ: Նա սատարող է, մյուսները՝ գործողություն իրականացնող: Կարո Եղնուկյանին 15 ամիս հանիրավի պահում են բանտերում, ոտնահարում նրա իրավունքները: Եվ հիմա դատն արեցին, և հանկարծ այնպիսի հրաշք կատարվեց, որ պարզեցին, որ այս մարդիկ անմեղ են, հանուն ինչի նրանք կալանավորված մնացին, ով է իրավունք տվել մարդուն կալանավորել, մինչև կպարզեին՝ մեղավո՞ր է, թե՞ ոչ»,- ասաց Թամար Հովհաննիսյանը:
Սա, նրա խոսքերով, տանում է դեպի շատ ծանր և ողբալի ավարտ: ԵՄ-ն, նրա կարծիքով, չպետք է գնա Հայաստան-ԵՄ համաձայնագրի ստորագրման, պետք է իշխանությանը պահանջներ դնի:
«Պետք է ասի, որ դու երկրում ունես քաղբանտարկյալներ, քո արդարադատության ամբողջ ոլորտը կախյալ է, ամոթ է ուղղակի»,- ասաց Թամար Հովհաննիսյանը:
Հարցազրույցն ամբողջությամբ՝ տեսանյութում:
