Կառավարությունը բացասական եզրակացություն է տվել ԱԺ պատգամավորներ Հեղինե Բիշարյանի, Հովհաննես Մարգարյանի, Խաչիկ Հարությունյանի, Իշխան Խաչատրյանի և Մարզպետունի Մանուկյանի՝ օրենսդրական նախաձեռնության կարգով ներկայացրած «Նորաստեղծ ընտանիքներին միանվագ դրամական օգնություն տրամադրելու մասին» օրենքի նախագծին։
Համապատասխան որոշման նախագիծը քննարկվելու է կառավարության առաջիկա նիստում։ Նշենք, որ «Նորաստեղծ ընտանիքներին միանվագ դրամական օգնություն տրամադրելու մասին» օրենքի նախագիծը ենթադրում է, որ նորաստեղծ ընտանիքների միանվագ դրամական օգնության նվազագույն չափը չի կարող պակաս լինել, քան 300 հազար դրամը։
«Նախագծի ընդունումը բերում է լրացուցիչ հատկացումների անհրաժեշտության, սակայն նրանում նշված չէ նորաստեղծ ընտանիքներին միանվագ դրամական օգնության տրամադրման ֆինանսավորման աղբյուրը, որն անհրաժեշտ է հստակեցնել:
Եթե այն Հայաստանի Հանրապետության պետական բյուջեն է, ապա այդ նպատակով համապատասխան միջոցներ նախատեսված չեն ինչպես Հայաստանի Հանրապետության 2011-2013 թվականների պետական միջնաժամկետ ծախսերի ծրագրով, այնպես էլ Հայաստանի Հանրապետության 2012-2014 թվականների պետական միջնաժամկետ ծախսերի ծրագրի նախագծով: Ուստի վերջինիս ընդունման դեպքում այն կմնա առանց ֆինանսական ապահովման»,- նշված է կառավարության եզրակացության նախագծում:
