«Սա խայտառակություն է։ Այսպիսի օրենք չի կարող ընդունվել։ Այս օրենքի պարագայում քաղաքացին զրկվում է դատական կարգով լսված լինելու իր իրավունքից»,- «Առաջին լրատվական»-ի հետ զրույցում ասաց ԱԺ «Ելք» խմբակցության պատգամավոր Էդմոն Մարուքյանը՝ անդրադառնալով դատարանների ծանրաբեռնվածության նվազեցման նպատակով Դատական օրենսգրքում կատարվող փոփոխություններին։
Նշենք, որ արդատարատության նախարարությունը փոխում է վարչական ակտերի բողոքարկման պայմանները։ Դատական օրենսգրքում համապատասխան փոփոխությունների նախագիծը հավանություն է ստացել հոկտեմբերի 19-ին կառավարության նիստում։ Նախարարությունը նոր նախագծով ամրագրել է, որ Վարչական դատարանի կողմից ենթակա են քննության անբողոքարկելի վարչական ակտերի հիման վրա ֆիզիկական անձանց նկատմամբ հանրային իրավական դրամական այն պահանջները, որոնք գերազանցում են հինգ հարյուր հազար դրամը: Օրինակ՝ ճանապարհային ոստիկանության կողմից արձանագրված խախտումների վճարները։ Այսինքն՝ մինչև 500 հազար դրամի վեճի պարագայում վարչական մարմինը դիմելու է ԴԱՀԿ բռնագանձումը իրականացնելու համար։ Իսկ 500 հազար դրամից ավելի տուգանքների դեքպում գործերը գնալու են Վարչական դատարան։
Նշենք, որ գործող օրենսդրությամբ այդ գումարը 200 հազար դրամն է։ Այսինքն՝ մինչև 200 հազար դրամը բռնագանձումն իրականացվում է արտադատական կարգով։
Էդմոն Մարուքյանի խոսքերով, սակայն, անգամ 200 հազար դրամի դեպքում քաղաքացին պետք է կարողանա դիմել դատարան և բողոքարկել այդ ակտը։ «Ես գիտեմ, որ հիմա ԱԺ-ում կբերեն Գերմանիայի և այլ երկրների օրինակներ, բայց մենք Գերմանիա չենք։ Մեզ մոտ ամեն քայլափոխի քաղաքացու նկատմամբ հազարավոր ապօրինի ակտեր են կայացվում։ Քաղաքացին պետք է կարողանա դրանք բողոքարկել վարչական դատարան և լսելի լինել։ Իսկ հիմա պետությունն առաջարկում է այդ բեռը դնել քաղաքացու ուսերին։ Այդպես չի լինում։ Դատարանները բեռնաթափելուց առաջ լավ կլիներ՝ իրենք փնտրեին և վերացնեին պատճառը, թե ինչու են այդքան ակտեր կուտակվում»,- մեզ հետ զրույցում նշեց Մարուքյանը։
Առավել մանրամասն՝ տեսանյութում։