Պաշտոնապես հայտնի է դարձել Ռուսաստանի վարչապետ Դմիտրի Մեդվեդևի հայաստանյան պաշտոնական այցի ժամկետը: Այցը տեղի կունենա հոկտեմբերի 24-ին, որի ընթացքում Մեդվեդևը կմասնակցի նաև ԵՏՄ վարչապետների հավաքին: Կլինե՞ր Մեդվեդևի այց Հայաստան, եթե չլիներ հավաքի առիթը, իհարկե՝ դժվար է ասել, սակայն ներկայիս այցը, որքան էլ տարօրինակ է, ավելի շատ ընկալվում կամ դիտարկվում է Հայաստանի ներքաղաքական, ներիշխանական զարգացումների համատեքստում ՌԴ ազդեցության կտրվածքով, քան Հայաստան-Ռուսաստան տնտեսական հարաբերության:
Խոշոր հաշվով սա նաև ցավալիորեն օբյեկտիվ իրողություն է՝ նկատի ունենալով այն, որ Ռուսաստանը դեռևս 2016 թվականի օգոստոսին է շատ հստակ կերպով հասկացրել Հայաստանին, որ ավելի շատ տնտեսական, այսպես ասած, հատկացումներ ակնկալել պետք չէ: Ի դեպ, հենց դրանից հետո Հայաստանում տեղի ունեցավ կառավարության փոփոխություն, և վարչապետ նշանակվեց Կարեն Կարապետյանը՝ առաջ բերելով նաև, այսպես ասած, ռուսաստանահայ կապիտալի ներդրումները Հայաստան բերելու թրենդը: Սակայն այդ ներդրումները չկան, կամ դրանց եղած ծավալներն ամենևին բավարար չեն Հայաստանում տնտեսական էական փոփոխություն արձանագրելու համար: Մյուս կողմից՝ այդ ներդրումները անկասկած ներիշխանական ստատուս քվոյի հարցում հարաբերությունների պարզաբանման խաղաքարտ են և գործում են «առավոտյան աթոռը՝ երեկոյան փողը» տրամաբանությամբ:
Ռուսաստանին այստեղ վերապահված է գուցե ոչ թե հովանավորի, այլ, այսպես ասած, պարեկի դերը, և այդ տեսանկյունից Մեդվեդևի այցը, իհարկե, թերևս ավելի շուտ ոչ թե պաշտոնական, այլ պարեկային այց է՝ ելնելով Հայաստանի համակարգի բնույթից և հայ-ռուսական հարաբերությունների կառուցվածքից: Ընդ որում, պարեկությունը ամենևին չի նույնականանում, այսպես ասած, մրցավարության կամ ժյուրիի գործառույթի հետ, առավել ևս՝ Մեդվեդևի կատարմամբ:
Բանն այն է, որ Մեդվեդևն ինքը գործնականում Ռուսաստանի իշխանական համակարգում մի վիճակում է, երբ պարզ չէ՝ կշարունակի՞ արդյոք պաշտոնավարումը 2018 թվականին, եթե Պուտինը գնա երկրորդ ժամկետին և դառնա նախագահ: Այդ իմաստով թերևս չափազանցված են սպասումները, որ Մեդվեդևի այցը նշանակություն է ունենալու Հայաստանի վարչապետի պաշտոնի խնդրում, այդ թվում՝ Կարեն Կարապետյանին աջակցության մասով:
Մեդվեդևը ներկայումս ՌԴ իշխանական համակարգում կամ ավելի շուտ՝ քաղաքական որոշումների կայացման հիերարխիայում թերևս «ակումբի անդամ» չէ: Ավելին, նախօրեին «Վալդայ» ակումբում Պուտինի ելույթը հուշում էր, որ Ռուսաստանի նախագահի պաշտոնում երկրորդ անգամ երկրորդ ժամկետի գնացող Պուտինը լիովին նոր շեշտադրումներով է սկսելու այդ ժամկետը, այդ թվում՝ տնտեսական քաղաքականության մասով: Նոր շեշտադրումները դեռևս չեն նշանակում որակապես նոր արդյունքներ, այսինքն՝ մի բան է խոսքը և մեկ այլ բան՝ գործը, սակայն դա առնվազն կարող է նշանակել վարչապետի փոփոխություն, ինչը ՌԴ ներկայիս տնտեսական իրավիճակի առումով անհրաժեշտություն է դարձել գործնականում վաղուց:
Ավելին, Ռուսաստանի իշխանական համակարգում ներկայումս բավականին սրվում է, այսպես ասած, տարբեր տնտեսաքաղաքական խմբերի ներիշխանական պայքարը, և այդ տեսանկյունից Մեդվեդևը նույնպես գտնվում է ոչ շահեկան վիճակում, քանի որ նա բոլորի համար ընդունելի «նվազագույն հաղթանակ» է:
Այդ տեսանկյունից Մեդվեդևի հայաստանյան այցն ընդամենը «մոնիտորինգ» է, թերևս վերջինը՝ Հայաստանի հարցով զեկուցողի պաշտոնում: Մեդվեդևը գործնականում այդ կարգավիճակում հայտնվեց 2016 թվականի ապրիլի պատերազմից հետո, երբ Պուտինը նրան գործուղեց Հայաստան, իսկ հետո՝ Բաքու:
