Երևանի մամուլի ակումբի ղեկավար Բորիս Նավասարդյանի կարծիքով՝ չի բացառվում, որ Հայաստան-ԵՄ համապարփակ և ընդլայնված գործընկերության համաձայնագիրը չստորագրվի նոյեմբերի 24-ին՝ Բրյուսելում կայանալիք Արևելյան գործընկերության գագաթնաժողովի ընթացքում։ Նավասարդյանը միևնույն ժամանակ վստահեցնում է՝ այս իրավիճակը պետք չէ նմանեցնել 2013-ին, այս դեպքում ոչ թե գործընթացը չեղարկվում է, այլ՝ հետաձգվում. «Հայաստանում տեղի են ունենում քաղաքական համակարգի հետ կապված լուրջ փոփոխություններ, և շատ անդամ երկրներ ուզում են հստակ պատկերացնել, թե ում հետ են գործ ունենալու ստորագրումից հետո։ Թեպետ ավելի լավատեսական ժամկետներ են նշում փորձագետները, բայց ես չեմ բացառում, որ ստորագրումը կարող է հետաձգվել մինչև ապրիլ-մայիս»,- «Առաջին լրատվական»-ի հետ զրույցում ասաց Նավասարդյանը։
Մեր զրուցակիցը հավելում է՝ պաշտոնական մակարդակով Ռուսաստանը որևէ միջամտություն չի ունենալու. «Հակառակ դեպքում Հայաստանի իշխանություններն այդպես վստահ չէին հայտարարի, որ ստորագրելու են կամ չէին գնա համաձայնագիրը հրապարակելու ճանապարհով։ Դա նշանակում է, որ տեքստը համաձայնեցված է»։
Ըստ Նավասարդյանի՝ կան ԵՄ անդամ երկրներ, որոնց համար կարևոր է՝ ով է լինելու Հայաստանի ղեկավարը. «Կան երկրներ, որ կուզենային Հայաստանի իշխանության գլխին տեսնել արևմտամետ գործիչ, և նրանց համար Ռուսաստանի հետ սերտ հարաբերություններ ունեցող անձը գուցե կասկածների առիթ տա։ Մենք շատ լավ հասկանում ենք, թե Ռուսաստանի հետ ինչպիսի խնդիրներ ունեն ԵՄ անդամ մի շարք երկրներ»։
Հարցազրույցն ամբողջությամբ՝ տեսանյութում:
