Գյուղատնտեսության նախարարությունն առաջիկայում անասնակերերի արտադրության խթանմանն ուղղված ծրագրեր է իրականացնելու, որպեսզի կաթի և մսի ոլորտում ավելացվի տեղական արտադրությունը։ Այս մասին ասաց ՀՀ գյուղատնտեսության նախարարի տեղակալ Արմեն Հարությունյանը։
«Պարենի միջազգային օրը նվիրված է գյուղատնտեսության կայուն զարգացմանը, ինչպես նաև այն բոլոր խնդիրներին, որոնք առկա են պարենային անվտանգության ոլորտում։ Պարենային ապահովության հարցը կարևոր նշանակություն ունի թե՛ մեր հանրապետությունում, թե՛ ամբողջ աշխարհում։ Մենք արտադրում ենք Հայաստանում սպառվող պարենի շուրջ 40 տոկոսը, բայց պարենային ապահովությունը չի ենթադրում միայն ինքնաբավության մակարդակի ապահովումը։ Երրորդ երկրի հետ ազատ առևտրի համաձայնագրեր կնքելը նպաստում է, որպեսզի մենք կարողանանք վաճառել այն ապրանքները, որտեղ մենք ունենք մրցակցային առավելություն»,- նշեց ՀՀ գյուղատնտեսության փոխնախարարը։
Պարենային անվտանգության մակարդակը վերջին տարիներին Հայաստանում հասել է 60-65 տոկոսի։ Մրգի, բանջարեղենի, կաթնամթերքի, մսի որոշ տեսականու մասով ինքնաբավության մակարդակը բավարարում է։
«Այսօր Հայաստանը ներկրում է խոզի միսը և թռչնամիսը, բայց պետական քաղաքականությունը գնում է այն ուղղությամբ, որպեսզի հնարավոր լինի զարգացնել անասնապահությունը։ Հետագայում մեր ծրագրերը նպատակաուղղված կլինեն կերի արտադրության խթանմանը և տոհմային անասնաբուծությանը, որպեսզի կաթի և մսի ոլորտում ավելացվի տեղական արտադրությունը»,- ընդգծեց Արմեն Հարությունյանը։
ՄԱԿ-ի պարենի և գյուղատնտեսության կազմակերպության անդամ երկրների կողմից ամբողջ աշխարհում 1979 թվականից հոկտեմբերի 16-ը նշվում է որպես Պարենի համաշխարհային օր՝ հանրության ուշադրությունը սևեռելով սննդի ոլորտում առկա արդի հիմնախնդիրներին։
ՄԱԿ-ի որոշմամբ 2017 թվականին Պարենի համաշխարհային օրվան նվիրված միջոցառումներն անց են կացվում «Փոխենք միգրացիայի ապագան, ներդրումներ կատարենք պարենային անվտանգության և գյուղական համայնքների զարգացման գործում» խորագրի ներքո։
