«Մեզ նոր արյուն է պետք: Դրսում հանդես եկող ֆուտբոլիստները՝ Բայրամյանը, մյուսը-մյուսը, կարող են թարմ ուժ հաղորդել: Ֆուտբոլիստը նախ իր վրա պետք է աշխատի: Այս կազմով բարդ կլինի պայքարել անգամ Ազգերի լիգայում: Ունենք շատ տաղանդավոր և երիտասարդ ֆուտբոլիստներ, բայց աճ չի նկատվում նրանց մոտ: Միգուցե բավարարվում են, որ խաղում են Բարձրագույն խմբում կամ մինչև 21 տարեկանների հավաքականում: Կարծում եմ, որ ֆուտբոլիստն է իր աճի համար պատասխանատու: Նրանք պետք է լավ խաղան, աճ գրանցեն, նոր մենք նրանց հրավիրենք հավաքական»,- այսպիսի հայտարարությամբ էր հանդես եկել ֆուտբոլի Հայաստանի ազգային հավաքականի գլխավոր մարզիչ Արթուր Պետրոսյանը աշխարհի առաջնության ընտրական փուլի Լեհաստանի հետ հանդիպումից հետո:
Տապալման մեջ մեղադրելով թույլ ֆուտբոլիստներին՝ Հայաստանի ազգային հավաքականի մարզիչը հիշատակել էր մի «փայլուն միտք», որ նոր ֆուտբոլիստներ հավաքական բերելու դեպքում խաղի որակը կփոխվի: Բնական է, որ բարձրակարգ ֆուտբոլիստները կուժեղացնեն կազմը: 6:1 հաշվով կրած պարտությունից հետո «Ռոստովի» պաշտպան Խորեն Բայրամյանի անունը հնչեցնելն ամենևին պատահական չէր: Պետրոսյանը հույս ունի, որ «վաղը» այս ֆուտբոլիստը կմիանա Հայաստանի ազգային հավաքականին և նոր արյուն կտա հոգեվարքի մեջ գտնվող թիմին: Նման հույսեր է փայփայում նաև Ռուբեն Հայրապետյանը, ով խայտառակ պարտություններին որևէ կերպ չի արձագանքել:
Նշենք, որ Խորեն Բայրամյանը, «Տոսնոյի» դարպասապահ Դավիթ Յուրչենկոն, «Լոկոմոտիվում» հանդես եկող Արշակ Կորյանը և Ռուսաստանում հանդես եկող էլի մի շարք ֆուտբոլիստներ Հայաստանի ազգային հավաքականին չեն միանում այս երկրում գործող արտասահմանցի ֆուտբոլիստների լիմիտի՝ սահմանափակման պատճառով: Ավելի ստույգ՝ այս պահին Ռուսաստանում գործում է լեգեոներների վերաբերյալ 6+5 ձևաչափը: Այսինքն՝ հանդիպման ժամանակ խաղադաշտում առավելագույնը կարող են լինել 6 արտասահմանցի ֆուտբոլիստներ:
Վերը թվարկված հայ ֆուտբոլիստները Ռուսաստանի քաղաքացիներ են և չեն համարվում լեգեոներներ: Հայաստանի հավաքականում խաղալու դեպքում նրանք Ռուսաստանում կհամարվեն արտասահմանցիներ և, կոպիտ ասած, կընկնեն լիմիտի տակ: Այսինքն՝ նրանք հիմնական կազմում տեղ ունենալու համար ստիպված կլինեն պայքարել բավական ուժեղ լեգեոներների հետ, որոնց հրավիրելու համար ակումբը խոշոր գումարներ է ծախսել: Ըստ էության միանալով Հայաստանի հավաքականին՝ Ռուսաստանում բնակվող հայ ֆուտբոլիստները լուրջ խնդիրների առաջ կկանգնեն:
Օրեր առաջ Ռուսաստանի նախագահ Վլադիմիր Պուտինը ֆիզիկական կուլտուրայի զարգացման վերաբերյալ համաժողով էր կազմակերպել, որի ընթացքում ընդունվել է ֆուտբոլի զարգացման «Ստրատեգիա-2030» ծրագիրը: Այս ծրագրի կետերից մեկի համաձայն՝ 2018 թվականի աշխարհի առաջնությունից հետո լեգեոներների վերաբերյալ Ռուսաստանում գործելու է 10+15 ֆորմատը: Այսինքն՝ ամբողջ մրցաշրջանի համար թիմերը իրավունք կունեն հայտավորելու 10 լեգեոներների և 15 տեղացի ֆուտբոլիստների: Ռուսաստանի 2018/2019 թթ. առաջնությունում այլևս չի գործի լիմիտ, խաղադաշտում գտնվող արտասահմանցի ֆուտբոլիստները և մարզիչները հնարավորություն կունենան խաղադաշտ դուրս բերելու նույնիսկ ընդամենը մեկ ռուսաստանցի ֆուտբոլիստի: Ավելին, այս ձևաչափում ԵԱՏՄ-ի անդամ երկրների ֆուտբոլիստները չեն համարվի լեգեոներներ: Սա նշանակում է, որ աշխարհի առաջնությունից հետո Ռուսաստանում հանդես եկող հայ ֆուտբոլիստները կկարողանան առանց խոչընդոտների միանալ մեր երկրի ազգային թիմին:
Նշենք, որ Ռուսաստանի բասկետբոլի առաջնություններում ԵԱՏՄ երկրների քաղաքացիները այս տարվանից լեգեոներ չեն համարվում: Ռուսական ֆուտբոլում սպասվող փոփոխությունից հետո, բնականաբար, մի շարք ֆուտբոլիստներ՝ Բայրամյանի գլխավորությամբ, կմիանան Հայաստանի ազգային հավաքականին: Վերջինս, բնականաբար, կուժեղանա և իրական հնարավորություն կունենա Ազգերի լիգայի խաղարկության միջոցով 2020 թվականի Եվրոպայի առաջնության եզրափակիչ փուլի ուղեգիր նվաճելու: Իսկ Եվրոպայի առջնության եզրափակիչ փուլում հայտնվելը թե՛ Հայրապետյանի և թե՛ Պետրոսյանի համար հիանալի առիթ կլինի հերոսներ ինքնահռչակվելու:
Այս հեռանկարն աչքի տակ ունենալով՝ ՀՖՖ նախագահը չի կարող ուղղակի թողնել և հեռանալ: Երբ վիճակը կրիտիկական է, ֆուտբոլը հողին հավասարեցրած անձինք, ինչպես քաղաքական գործիչները, փրկության հույսը կապում են Ռուսաստանի հետ:
