Իշխանությունների հետ երկխոսելու համար պատվիրակություն կազմելը որոշվել է հունիսի 2-ին՝ Հայաստանում ԱՄՆ դեսպան Մարի Յովանիովիչի և Լևոն Տեր-Պետրոսյանի հանդիպումից հետո։ Այս մասին այսօր լրագրողների հետ հանդիպման ժամանակ ասաց քաղաքագետ Հմայակ Հովհաննիսյանը՝ շեշտելով, որ մայիսի 31-ի ՀԱԿ-ի հանրահավաքից հետո հունիսի 1-ին տեղի ունեցած ՀԱԿ քաղխորհրդի նիստում խոսք չի եղել որևէ պատվիրակություն կազմելու շուրջ։
Սա, ըստ Հ.Հովհաննիսյանի, ենթադրում է, որ ՀԱԿ-ը որոշակի երաշխիքներ ունեցել է, որ նման ձևաչափով երկխոսություն այնուամենայնիվ կկայանա։ Այդ պատճառով էլ Հ.Հովհաննիսյանն իր հետ բանավիճող ՀՀԿ-ական պատգամավոր Մկրտիչ Մինասյանին հարցրեց, թե իրենց «արևմտյան» կառույցներից առաջարկ չի՞ եղել բանակցել ՀԱԿ-ի հետ պատվիրակությունով։ «Ո՛չ, չի առաջարկվել պատվիրակությունով բանակցելու։ Հարցադրումներն ու երկխոսությունը միշտ էլ գնացել է»,- պատասխանեց Մ. Մինասյանը։
Ըստ Հ.Հովհաննիսյանի՝ եթե այդ երկխոսությունն իրականանա, դա կենթադրի ՀՀԿ-ի մի քանի հոգանոց վերնախավից որոշումների կայացման գործընթացի տեղափոխում դեպի «կլոր սեղան»։ «ՀԱԿ-ը շահագրգռված է, որ իշխանությունը սահուն կերպով Հանրապետական կուսակցության վերնախավից անցնի դեպի ահա այս՝ ըստ էության ոչ թե երկխոսության ֆորմատ, այլ կլոր սեղանի ֆորմատ»,- ասաց Հ.Հովհաննիսյանը։
Հարցին, թե իշխանության կողմից երկխոսության ՀԱԿ-ի ֆորմատը մերժելու պարագայում կարելի՞ է արդյոք համարել, որ ՀԱԿ-ը վերջնականապես ձախողվեց, Հ. Հովհաննիսյանը պատասխանեց. «Ճտերն աշնանն են հաշվում»։ «Եթե ՀԱԿ-ին չհաջողվեց հասնել ՀՀԿ-ի կողմից պատվիրակության և այս կլոր սեղանի ձևավորմանն ու հետագայում արդեն կադրային հարցերի վերաբերյալ պահանջների կյանքի կոչման գործընթացի սկզբին, ապա, իհարկե, ՀԱԿ-ը կձախողվի»,- նշեց Հ. Հովհաննիսյանը։