Ռուսաստանն ու Իրանը համաձայնացրել են իրանական նավթի մատակարարումներին առնչվող փաստաթղթերը։ Այս մասին հայտարարել է ՌԴ էներգետիկայի նախարար Ալեքսանդր Նովակը, հայտնում է Interfax-ը։
«Մեր երկրների միջև գործում է համագործակցության մասին հուշագիր, այն նախատեսում է նավթի մատակարարումներ և նավթի մատակարարումներից ստացված միջոցների կիրառում ռուսական ապրանքների ու ծառայությունների գնման վրա։ Մեր իրանցի գործընկերների հետ մենք հաջողությամբ համաձայնեցրել ենք բոլոր անհրաժեշտ փաստաթղթերը, որոնք վերաբերվում են այդ հարցերի նորմատիվ կարգավորմանը»,-հայտարարել է նախարարը։
Նովակի խոսքով՝ մեկ ամսվա ընթացքում Ռուսաստանն ու Իրանը կանցնեն այդ հարցում կոնկրետ գործարքի իրագործման։
Իրանից Ռուսաստան նավթի մատակարարումները կիրականացվեն «նավթ՝ ապրանքների դիմաց» ծրագրով։ Նման մատակարարումների մասին համաձայնագիրը Մոսկվան ու Թեհրանը կնքել էին մայիսին։ Խոսքը վերաբերվում է Ռուսաստանին օրական 100 հազար բարել նավթ վաճառելուն։
