Իրանական միջուկային ծրագրի մասին հարցը կարող է վերջնականապես կարգավորվել առնվազն վեց ամսից: Դրա համար անհրաժեշտ է միայն Ժնևի բանակցություններին մասնակցող կողմերի (Թեհրան և միջազգային «վեցյակ») բարի կամքը: Ինչպես հաղորդում է IRNA գործակալությունը, այս մասին հայտարարել է Իրանի արտգործնախարարի տեղակալ Աբաս Արաղչին:
Նրա խոսքերով՝ իրանցի բանագնացների նոր խումբը, որը ստեղծվել է նախագահի պաշտոնում Հասան Ռուհանիի ընտրվելուց հետո, հիմնվում է նախորդ բանագնացների փորձի, բանակցությունների նախորդ փուլերի ձեռք բերած հաջողությունների և անկումների վրա: Արաղչին ընդգծել է, որ խումբն ուղղված է հիմնական սկզբունքների իրագործման վրա, որոնք Նյու Յորքում մեկնաբանել է Իրանի արտգործնախարարը, և որը դրական է ընդունվել «վեցյակ»-ի նրա գործընկերների կողմից:
Նա հավելել է, որ իրանական կողմի կարծիքով՝ նախատեսվող բանակցությունները պետք է երկու փուլի բաժանվեն:
«Առաջին փուլում նպատակների և հեռանկարների հարցում անհրաժեշտ է հասնել փոխզիջման, որպեսզի մթության մեջ առաջ չշարժվենք: Հիմնական նպատակն է հասնել այն բանին, որպեսզի բանակցությունների արդյունքում պարտվողներ չլինեն, այլ հաղթեն բոլորը: Երկու կողմերն էլ պետք է հավասար իրավունքներ ունենան, հակառակ դեպքում մենք փոխզիջումների չենք գնա»,- ընդգծել է դիվանագետը:
Արաղչիի խոսքերով՝ երկրորդ փուլում պետք է մեկը մյուսի հետևից գործնական քայլեր արվեն՝ ռազմավարական նպատակին հասնելու ուղղությամբ, որոնք կկրեն ռեալիստական և հավասարակշռված բնույթ:
«Վերջին քայլից և վերջնական նպատակին հասնելուց հետո իրանական միջուկային գործը պետք է ՄԱԿ ԱԽ-ից փոխանցվի Ատոմային էներգիայի միջազգային գործակալություն»,- եզրափակել է Արաղչին:
Հիշեցնենք, որ ժնևյան բանակցությունները կայանալու են երեքշաբթի: