Այսօր Երևանում մեկնարկած Եվրոպայի խորհրդի անդամ երկրների մայրաքաղաքների միջազգային համաժողովի ժամանակ Երևանի ավագանու անդամ, Երևանի քաղաքապետարանի քաղաքաշինության հարցերի հանձնաժողովի նախագահ, ԵՃՇՊՀ ռեկտոր Հովհաննես Թոքմաջյանն իր զեկույցում նշեց, որ քաղաքը առողջ է այնքանով, թե ինչքան առողջ է այն շնչում: Կանաչ զանգվածների նորման, նրա խոսքով, տարբեր մոտեցումներով աշխարհում գնահատվում է մեկ մարդուն ընկնող մակերեսով՝ տվյալ զանգվածի 16-21 քառ.մետր:
Նրա խոսքով՝ եթե մեր համաքաղաքացիները կարծում են, որ այս խնդիրը միայն Երևանի խնդիրն է, ապա չարաչար սխալվում են, քանի որ այն կանգնած է շատուշատ քաղաքների առաջ: Նրա դիտարկմամբ՝ մեծ քաղաքներից քչերն են, որ կարողացել են լուծել այս հարցերը և այսօր տիրապետում են կանաչ այն զանգվածին, որ անհրաժեշտ է մեկ շնչին ընկնող մակերեսին: Հովհաննես Թոքմաջյանը առանձնացրեց Մոսկվան, որտեղ մեկ շնչին ընկնում է 20,2 քառ.մետր կանաչ զանգված, Կիևը, որ ունի մոտավորապես նույն ցուցանիշը, և Պեկինը, որ ունի 10 քառ.մետր մեկ մարդուն ընկնող տարածք, ընդ որում՝ նշեց, որ Պեկինը այս արդյունքներին հասել ընդամենը 25 տարվա ընթացքում: Տոկիոյում 60-ականներին այս ցուցանիշը մեկ, իսկ հիմա հինգ տոկոս է կազմում, Երևանում կա 5,2-6 քառ.մետր զանգված մեկ մարդու հաշվով, այսինքն՝ մեր ցուցանիշը մոտ է Տոկիոյի ցուցանիշին:
Նա պատմական էքսկուրս կատարեց, երբ 1960թ. կանաչ տարածքները եղել են 1900 հեկտար, ընդամենը տասը տարի հետո Երևանի զարգացման ոսկեդարն էր, ավելացել է շուրջ երեք անգամ, և 1970թ. այն արդեն կազմում էր 6850 հեկտար: Ծրագրված էր, որ 2000 թվականին այն պետք է հասնի 9064 հեկտարի, սակայն տեղի ունեցած իրադարձությունները և էներգետիկ ճգնաժամը հնարավորություն չտվեցին այս ծրագրի իրականացման համար, և 1993-ից աննախադեպ ձմռան և նաև էներգետիկ շրջափակման պայմաններում մասսայական ծառահատումներ տեղի ունեցան:
Նա զեկույցում նշեց, որ «Երևաննախագծի» և մասնագիտական այլ կազմակերպությունների կողմից իրականացված ուսումնասիրությունները ցույց են տալիս, որ եթե մենք ճիշտ օգտագործենք Երևանի մուտքերի մոտ գտնվող հատվածները, 15 տարիների ընթացքում հնարավոր է այս թիվը բարձրացնել և 1800 հեկտարով ավելացնել: Ճիշտ քաղաքականության դեպքում մենք 15 տարի հետո 19,85 քառ.մետր կանաչ զանգված կունենանք և կմոտենանք Մոսկվայի և Կիևի ցուցանիշներին: «Սրա համար քաղաքական կամք է պետք, որը ունի մեր իշխանությունը»,- ասաց նա:
Նրա խոսքով՝ առաջին հերթին ոռոգման համակարգի արդիականացում պետք է իրականացվի, առանց որի՝ հնարավոր չէ կանաչի ավելացում, անհրաժեշտ է, որ ոռոգման համակարգի կառավարումն իրականացվի քաղաքապետարանի ներքո:
